Газманов «Дуслык» ордены белән, Киркоров 27 чемодан белән: Казанда «Яңа дулкын» башланды

Моңа кадәр «Яңа дулкын» озак еллар Латвиянең Юрмала шәһәрендә, аннан Сочида узган иде. Фестивальнең беренче көнендә сәхнәдә рус эстрадасы йолдызлары чыгыш ясады. Ачылу тантанасын социаль челтәрләрдә күзәтеп булды. Ә без йолдызлар белән кызыл келәмдә аралаштык. 

«Өчпочмаклар искиткеч!»

Кызыл келәмгә иң беренчеләрдән булып танылган блогер Алена Жигалова («Алена, Блин!» проекты алып баручысы) чыкты. Аның образы «101 далматинец» мультфильмыннан Круэлла Де Вильне хәтерләтте. 

— Узган ел бөтен Казанны әйләнеп чыктым. Кол Шәрифкә кердем, Кремльдә булдым, яр буенда, Иске Татар бистәсендә дә йөрдем. Шулкадәр яхшы ял иттем, тәмле ашадым. Өчпочмаклар искиткеч! Узган ел ат итеннән ясалган бер ризыкны ашадым, исемен хәтерләмим. Шундый тәмле булды, туктый алмады. Хәтта "Яңа дулкын«ның бер көнен калдырдым. Казан — яраткан шәһәрләремнең берсе, — диде ул. 

«Нәрсәдер бирү өчен, башта үзеңдә нәрсәдер булырга тиеш»

Кызыл келәмнән сәхнәдә дистәләгән еллар чыгыш ясаучы тәҗрибәле җырчылар узды. Киңәшләрен дә жәлләмәделәр. 

— Танылу турында уйлап кына танылып булмый. Иң беренче чиратта артист үз иҗатыннан тәм алырга тиеш. Үзеңнең иҗатыңны яратсаң, күңелең мәхәббәт һәм канәгатьлек хисеннән ташып торганда гына бу эмоцияләрне тамашачыга җиткереп була. Кемгәдер нәрсәдер бирү өчен, башта үзеңдә нәрсәдер булырга тиеш, — ди Ани Лорак. 

Сүз уңаеннан, Ани Лорак Казан соборына керергә теләвен дә әйтте. «Мин дингә якын. Һичшиксез барырга тырышачакмын», — диде.  Тәҗрибәле артистлар яшьләрдән курыкмый. Олег Газманов бу мәсьәләгә фәлсәфи яктан карый. 

— «Яшь башкаручылар үкчәгә басым килә», — дип әйтеп, менә шул хисне тоясы килә. Бәлки, бу миңа да файдалы булыр иде. Яңа алымнар, аранжировкалар карарга кирәк. Яшьләрнең костюмнарына кызыкмыйм, анысы минеке түгел. Шоу-бизнеста югарырак нота алганнар түгел, нотаны озаграк суза алганнар кала, — ди ул. 

Олег Газманов һәм «Дуслык» ордены

Олег Газмановның образы көндәлек сәхнә киемнәреннән аерылмады. Шулай да җырчының күкрәгендә «Дуслык» орденының бер өлеше бар иде. «Орден зур, шуңа аның репликасын тактым. Горурлык белән тагам», — дип сүзен башлады ул. 

— Казан һәм Татарстан турында сөйләгәндә елмаясым килә. Монда минем чын дустым, якыннарым бар. Татар милли ашларын бик яратам. Баллы ризыктан кала барысын ашыйм. Гомумән, үзгәртеп кору елларыннан алып тарихка күз салсак, Казан киләчәккә бик зур адым ясады. Төзек биналар, яңа архитектура, музей, театрлар! Россиядә бердәнбер югары белемле танк училищесы бар. «Танки» җырына клип мин нәкъ шунда төшердем, — ди. 

Игорь Крутой: «Сәясәткә бөтенләй кысылмыйм»

Ниһаять, кызыл келәмгә проект хуҗасы — Игорь Крутой чыкты. Узган ел аның: "Татар җырчылары "Яңа дулкын"да чыгыш ясарга әзер түгел әле«, — дигән сүзләр матбугатта тиз таралды. Продюсерны тәнкыйтьләп: «Кунак ашы кара-каршы», — дип әйтүчеләр дә булды. Ә быел исә, бәйгедә Казан егете Игнат Изотов та катнаша. 

— Игнат барлык сайлап алу турларын үтте. Мин сәясәткә бөтенләй кысылмыйм. Раймонд Паулс белән икәү "Яңа дулкын«ны Юрмалада башлап кына җибәргәндә: «Сәясәт булмасын. Россиянең дә, Латвиянең дә мәдәният министрлыгы иҗади процесста катнашмасын иде. Кемгә җырларга, кемне бүләкләргә... Барысы гадел булсын», — дип килешеп куйган идек. «Яңа дулкын» үз тарихында өч шәһәрдә узды. Һәр шәһәрдә тамашачы үзгә. Казанда тамашачылар һәр җырчыны алкышларга күмә. Гадәттә премьераларны салкын кабул итәләр, ә Казанда яңа җырларны да кызыксынып тыңлыйлар, — дип ачыклап үтте Игорь Крутой.

Игнат Изотов белән дә сөйләшеп алдык. Татар җырчыларыннан Ришат Төхвәтуллинны һәм мэтролар: Илһам Шакиров, Әлфия Авзалованы тыңлый. Татарча җырлатып та карадык. Игнат "Идел буе каеннары«н чип-чиста татарча җырлады. Моң да, барлык сүзләр дә үз урынында иде. Афәрин!

Филипп Киркоровка күз тигән?

Рус эстрадасы йолдызларыннан журналистлар белән иң озак аралашкан җырчы — Филипп Киркоров иде. Кызыл келәмнең башыннан уртасына килеп җиткәнче генә дә ярты сәгать үтте. Филипп рус эстрадасының поп-короле исемен йөртсә дә, үзен бер дә патшаларча тотмады. Журналистларның барлык сорауларына да ачык, берни яшермичә, рәхәтләнеп җавап бирде. Татар эстрадасының кайбер артистларына бераз үрнәк алсалар да була. 
Узган ел Филипп Киркоров сәхнәдә егылган иде, ә быел яңгыр астында җырлады. Әллә күз тигән инде.

— Мин сәхнәгә чыкканда һәрвакыт бер-бер хәл килеп чыга. Рус эстрадасында андый җырчылар икәү генә. Мин һәм Валерий Леонтьев. Менә бүген яңгыр яуганда җырладым, — ди ул. 

Шулай да поп-король үз исемен образы белән аклады. Филипп Киркоровның аяк киеме беркемне дә битараф калдырмагандыр. Мода шундый әйбер инде: башта мәзәк кебек тоела, ә аннан шундый ук туфли алып кигәнеңне сизми дә каласың. Сүз уңаеннан, Филипп Киркоров Казанга 27 чемодан белән килгән! «Кая киеп бетерә?» — дип сорарсыз. «Съемкалар, чыгышлар, фотосессияләр күп. Шәһәргә чыгып керергә, отельдә иртәнге аш ашарга төшкәндә дә матур буласы килә», — диде Филипп. Дөрес инде, кием шкафта эленеп яту өчен алынмаган бит. Филипп кызыл келемгә киеп чыккан аклы-сарылы куртканың гына да 10га якын төре бар икән. 

— Мин, гомумән, чыгыш ясаганчы беркем белән сөйләшмәскә тырышам. "Яңа дулкын«ның беренче көне булгач, бик борчылдым, шуңа шоппингка бардым. Казанда яхшы кибетләр күп икән. Очсыз әйберләр алырлык байлыгым юк. Сыйфатлыны сайларга тырышам. Мин Казанда беренче тапкыр гына түгел. Шәһәрне бик яхшы беләм, аркылыга да, буйга да йөреп чыктым, хәтта экскурсия үткәрә алам, — ди ул. 

«Кешенең тормышында төрле хәлләр була»

Журналистлар сорауларны яудырып торды. Филипп Киркоров турында нинди генә фактлар ачыкланмады. Җырчы хәмер эчми һәм хәмер эчкән кешеләр белән мөнәсәбәтләр ачыклауны да кулай күрми икән. Артык 5 килограмм авырлыгы бар, хәзер диета тота. Шуңа «7 көнгә авызыма йозак элдем, милли сыйларны ашыйсы килә, әмма ярамый», — диде. 

— Дублинда "Евровидение"дә җиңелгәч каты исергән идем. Соңыннан бөтенләй егылдым. Бернәрсә дә хәтерләмәдем, билгеле. Кешенең тормышында төрле хәлләр була. Әмма беркайчан, бик куркыныч хәл булса да, мөнәсәбәтләр ачыкларга кирәкми. Аеруча балалар белән. Баланы кочакларга, тынычландырырга кирәк. Иртән чиста баш белән барысын уртага салып сөйләшү хәерлерәк, — диде ул. 

Филипп Киркоров — эпотаж җырчы. Аны яратучылар да, яратмаучылар да җитәрлек. Шулай да ул үз стиленә тугры кала. 

— Мин бернинди рольдә уйнамыйм. Ничек бар шулай. Яхшы якларым да, кимчелекләрем дә бар. Әгәр тормышымда барысы да начар икән, начар дим. Шатлыклы яңалыкларым бар икән, шатланам. Халык ихласлыгымны яратадыр. Шоу-бизнес — ясалмалык оясы, — ди җырчы. 

Алсудан татарча җыр

Кызыл келәмдә Алсу да булды. Читтән генә сәхнәдән "Ай былбылым«ны башкаруын ишетеп калдык. Дөресен әйткәндә, без моны көткән идек.

• Соңгы арада җырчы даими рәвештә спорт белән шөгыльләнә башлаган. «Үземне яхшырак хис итәм, кәефем дә күтәрелә. Көзгегә карагач, тагын ныграк кәеф күтәрелә. Мин үзлектән шөгыльләнәм. Соңгы арада минем тренер — кызым иде», — дип уртаклашты ул. 

«Яңа дулкын» фестиваленең беренче көне җисеменә туры килерлек булды. Башкалада яңгыр яуды. Шөкер, яңгыр озакка сузылмады. Дулкыннар гизеп, көймәдә катырга туры килмәде. Ә «Яңа дулкын» фестивале исә 26 августка кадәр дәвам итәчәк.