Илһам Шакиров һәм Әлфия Авзалова һәйкәлләре кайда урнаша һәм кайчан ачыла?

Илһам Шакиров һәм Әлфия Авзалова һәйкәлләренең урыны билгеле. Бу хакта Габдулла Тукай исемендәге татар дәүләт филармониясенең 89 нчы сезонына багышланган матбугат конференциясендә хәбәр иттеләр. Филармония җитәкчесе Кадыйм Нуруллин сүзләренчә, филармониягә йөкләнгән миссия күпкырлы, ул концертлар оештыру белән генә чикләнми. 

– “Сезон ачылу” һәм “сезон ябылу” дип әйтүебез дә очраклы гына. Филармония – тәүлек буе эшли торган оешмаларның берсе. Илһам Шакиров, Әлфия Авзалова кебек олуг шәхесләребез турында хәтерне мәңгеләштерү дә безнең мөһим бурычыбыз. Быел “Пирамида” концертлар залы янындагы Новокремлевская скверы Илһам Шакиров скверы исемен алды. Бөек җырчыбызга һәйкәлне дә шунда урнаштырачаклар. Шулай ук халык телендә Филармония янында сквер – Филармония скверы исемен йөртсә дә, бу рәсми рәвештә расланмаган, ул исемсез иде. Хәзер инде Филармония скверы, чыннан да, Филармония скверы исемен йөртә. Әлфия Авзаловага һәйкәл биредә урнашачак. Иң мөһиме – урыннары табылды. Якын арадагы 1-2 елда бу һәйкәлләр экскурсия маршрутларының бер өлеше булыр дип ышанасы килә. Илһам Шакиров һәм Әлфия Авзалова – татар эстрадасының ике канаты. Без аларның иҗатын халыкка оныттырмаска, алар турында якты истәлекләрне саклап калырга тырышабыз, – диде филармония җитәкчесе. 

Шулай ук быел татар эстрадасының якты йолдызы Хәния Фәрхи дә, исән булса, 65 яшьлек юбилеен билгеләп узар иде. Филармония җырчының иҗат җимешләреннән торган концерт та тәкъдим итә. Кадыйм Нуруллин сүзләренчә, әлеге тамаша Хәния Фәрхи тормышында зур урын алып торган шәһәрләрдә кую да планлаштырыла.