Кадыйм Нуруллин: «Филармония – югалып барган жанрларның сагында торучы оешма»

Быел башка еллардан аермалы буларак филармониягә абонементлар онлайн форматта сатылган. 
– Абонементларыбызны сатуга чыгардык кына ике көн эчендә сатылган абониментларның гомуми суммасы 5 миллион сумны артып китте. Бу – кайсыдыр концерт оешмаларның еллык бюджеты. Әлбәттә, тугры тамашачыларыбызга рәхмәт сүзләрен җиткерәм. Филармония – югалып барган жанрларның сагында торучы оешма. Филармония булмаса, без 36 жанрны сызып атабыз дигән сүз. 1993 елда филармония 4 коллективны җыеп тота иде. Бүген аларның саны 32гә тигез. Без дә заман белән бергә атлыйбыз, үсәбез – диде филармония җитәкчесе Кадыйм Нуруллин.  

Филармониянең 89 нчы сезоны татар эстрадасы йолдызлары катнашында "Илһамлы фестиваль" концерты белән башлана. Россиянең халык артисты, Илһам Шакиров исемендәге премия лауреаты Зилә Сөнгатуллина да сезон башлануын зарыгып көтә.
– Илһам Шакиров иҗаты белән сезон ачу да бик символик мәгънәгә ия. Классик, эстрада, һәвәскәр җырчылар барысы бер сәхнәгә җыела. Безне Илһам Шакировның иҗаты берләштереп тора. Үзегез дә күреп торасыз, мондый концертларга халык бик сусаган. Милли моңнарыбыз, чын чиста башкару беркайчан “мода”дан чыкмый, – диде ул. 

Филармониянең бу сезоны шулай ук мөһим юбилейларга бай. 26 февраль – Татар дәүләт филармониясенә Габдулла Тукай исеме бирелүгә 80 ел тула. Шулай ук 2026 елда филармониядә музыкаль-әдәби лекторий оешуга да 80 ел була. Лекторий юбилей сезонын Рөстәм Яхин иҗатына багышланган концерттан башлый.  Ә сезонны “Борис Годунов” куелышы белән йомгаклыйлар.

“Габдулла Тукай исемендәге татар дәүләт филармониясе – профессиональ югарылыктагы музыканы киң тамашачыга җиткерүче бердәнбер оешма”, – дип искәртте Айдар Фәйзрахманов.

– Музыканың теле дә, милләте дә юк. Аның сәнгати югарылыгы гына бар. Без фольклор музыкасы ансамбле белән 55 тапкыр 35 илдә гастрольләр куйдык. Чын мәгънәсендә балалар өчен дә, өлкәннәр өчен дә тамашачылар иҗатны күңел халәте буларак кабул итә, –  Татарстан дәүләт фольклор музыкасы ансамбле җитәкчесе Айдар Фәйзрахманов. 

Филармония коллективларының гастрольләре дә өзлексез дәвам итә. Беренче тапкыр Анатолий Шутиков җитәкчелегендә Татарстан дәүләт халык уен кораллары оркестрының гастрольләре Кытайда узачак. 21 октябрьдән- 13 ноябрьгә кадәр оркестр 15 шәһәрдә чыгыш ясаячак. Шул исәптән Шанхай, Ганьчжоу һәм Сучжоу шәһәрләрендә. Оркестр Кытай шәһәрләре буенча татар, кытай көйләренә нигезләнгән программа һәм Җиңүнең 80 еллыгына багышланган программаны үз эченә алган тамаша күрсәтәчәк.