Кайбыч районы Кичке уенга чакыра

Бу хакта оештыручылар фестивальгә багышланган матбугат конференциясендә хәбәр итте. Быел да фестиваль Зур Кайбычта узачак. Чара 2015 елдан үткәрелә. Бәйрәм халыкларның традицион матди булмаган мирасын саклауга һәм популярлаштыруга юнәлдерелгән.

Быел да фестивальдә Татарстанның 10 районыннан, шулай ук Марий Эл, Чувашиядән фольклор коллективлар чыгыш ясаячак. Гадәттәгечә, кичке уен кысаларында гармунчылар парады һәм Зәлидә күмәк биюе дә булачак. Кайбыч районы мәдәният бүлеге җитәкчесе Рәмилә Әбләзова сүзләренчә, бу елны төрле халыкларның милли биюләренә аерым игътибар биреләчәк.

– Бу инде традицион, көтеп алынган бәйрәм. Чара һәрвакыт җыр-биюләр белән үрелеп барды. Быел бераз яңалык кертеп, “Хәрәкәттә-бәрәкәт” проекты оештыручыларын да җәлеп итәргә булдык. Төрле халыкларның милли биюләрен өйрәнәчәкбез. Шулай ук бию көрәше бәйгесе дә булачак. Кичке уен форматы үсеп килүче буынга да үрнәк булсын дип тырышабыз, – диде Рәмилә Әбләзова.

Кичке уен фестиваленең кульминацион ноктасы – самавар кайнату уены. Шартлар буенча һәр район үз самаварын кайната..

– Кайбыч районында урманчылык көчле. Һәр район үз урманнарында үскән агачларны алып килеп, самавар кайната.  Кем җитезрәк шул җиңә. Шулай ук һәр район үз самаварының тарихын сөйли, гореф-гадәтләрен күрсәтә. Моңа өстәп, шифалы үләннәрен алып килеп, чәй ясап, кунакларны сыйлый, – ди Татарстанның атказанган артисты Динә Латыйпова.

Кичке уен фестивале 15 август Зур кайбычта Имәнлек паркында узачак. Керү ирекле.