БДИ-2026: Татарстан районнары да Казаннан калышмый — 460 укучы 100 балл җыйган

Бердәм дәүләт имтиханнары тәмам. Рәсми нәтиҗәләр әле тулысынча чыгарылмаса да, беренчел йомгакларны ясарга мөмкин. Саннар шатландыра: республика укучылары быел да Россия буенча уртача күрсәткечләрдән югарырак нәтиҗәләр күрсәткән, 100 балл җыючылар саны сизелерлек арткан, табигый-техник предметларны сайлаучы чыгарылыш сыйныф укучылары исәбе дә ишәйгән.

«Технарь»лар үстерәбез
Татарстан Мәгариф һәм фән министры Илсур Һадиуллин искәртеп узганча, быел Татарстанда Бердәм дәүләт имтиханын 18 меңнән артык кеше тапшырган. Имтиханнарны үткәрү өчен республика буенча 86 пункт эшләгән, аларда 6 меңнән артык педагог хезмәт куйган.

Имтиханнар барышында, гадәттәгечә, сынауларның гадел үтүенә аеруча зур игътибар бирелгән: кәрәзле элемтәне томалаучы җайланмалар һәм камералар урнаштырылган, 767 онлайн-күзәтүче һәм йөзләрчә җәмәгать күзәтүчесе күз-колак булган.

Соңгы елларда табигый-техник юнәлештәге предметлар белән кызыксынучыларны арттыруга көч куела башлаган иде. Быел бу эшнең уңай нәтиҗәсе инде сизелә. Профильле математиканы сайлаучылар саны бер ел эчендә 1174 кешегә арткан. Физика тапшыручылар 733 кешегә күбрәк булган. Химия һәм биология белән кызыксынучылар да күбәйгән.

Министр сүзләренчә, моңа республикада тормышка ашырылган «Физик-математик алгарыш» һәм «Физик-химик алгарыш» проектлары, шулай ук югары уку йортларына кабул итү кагыйдәләрендәге үзгәрешләр дә йогынты ясаган.

Нәтиҗәдә, Татарстан федераль проект куйган бурычны үтәгән: табигый-техник юнәлешләрне сайлаучылар өлеше 39,7 процент тәшкил иткән. План исә 38 процент булган.

Россия күләмендә алдынгылар
Быел Татарстан укучылары барлык предметлар буенча диярлек Россия күрсәткечләреннән югарырак нәтиҗә күрсәткән. Иң яхшы уртача баллар инглиз теле (74,23), физика (71,70), профильле математика (71,19) һәм рус әдәбияты (71,95) буенча теркәлгән.

Аеруча физика нәтиҗәләре сөендерә. Узган ел белән чагыштырганда уртача балл берьюлы 7,8 пунктка күтәрелгән. Профильле математика, информатика һәм биология буенча да үсеш күзәтелә.

Министр билгеләп үткәнчә, уңышлы нәтиҗәләрне Казан мәктәпләре генә түгел, районнар да күрсәтә. Арча районы, мәсәлән, табигый-фәнни юнәлешләрнең барысы буенча да алдынгылар исемлегенә кергән. 2025 ел белән чагыштырганда, уртача нәтиҗәләрнең уңай динамикасы күзәтелгән башка районнар да макталды.

Мәсәлән, физика буенча Тәтеш районында нәтиҗә +4,5 баллга югарырак булган, Кама Тамагында – 7,7 баллга, Спаста –13 баллга.  Биологиядән дә Спас районы уртача баллны 13 күрсәткечкә яхшырта алган.

460 тапкыр – 100 балл!
Быел Татарстанда әлегә 460 йөз баллы нәтиҗә теркәлгән. Аларны 408 чыгарылыш укучысы алган. Ике укучы исә өч фәннән 100әр балл җыеп, 300 балл нәтиҗәсенә ирешкән. Аларның берсе – КФУның IT-лицее укучысы Ләйсән Шакирова, икенчесе – Казан Суворов хәрби училищесын тәмамлаган Роман Сахарных. 48 чыгарылыш укучысы ике предмет буенча 200 балл җыйган.

Министр аерым рәхмәт сүзләрен укытучыларга җиткерде. Быел иң күп стобаллы укучы әзерләгән педагог – Казанның 131 нче лицее математика укытучысы Кирилл Сергеев. Аның 15 укучысы профильле математикадан 100 балл алган.