Ретта синдромына каршы дару уйлап табарга җыеналар

Ретта синдромы сирәк очрый торган авыру, ул генетика, психологик тайпылышлар белән бәйле. Авыруны 1966 елда беренче тапкыр Австрия неврологы Андреас Ретта ачыклый. Шуңа да чирне дә Ретта Синдромы дип атыйлар. Ул күбесенчә кызларда очрый. Статистика буенча, 15 мең кешегә 1 очрак туры килә. Татарстанның Сәламәтлек саклау министры Адел Вафин әйтүенчә, Татарстанда Ретта синдромы диагнозы куелган 6 бала исәпләнә. Аларның берсенә 20 яшь.

Ретта синдромлы балаларның 95 проценты сөйләшми. Ләкин алар белән ишарәләр ярдәмендә аңлашырга була. Алар тыныч, барысын да аңлыйлар, башка балалар кебек үк гадәти мәктәптә дә укырга мөмкиннәр. Авыру баласы булган гаиләләргә ярдәм итү, кызыксындырган сорауларына җавап табу, табиб киңәшләре алу мөмкинлеге булдыру максатыннан Казанда шундый зур чара уздыралар.

- Безнең өчен бу конгрессны уздыру бик мөһим. Бу яңа белемнәр алырга һәм тернәкләндерү буенча заманча алымнар турында белергә ярдәм итәчәк, - дип саный Адел Вафин.

- Конгресста Австралиядән килгән Балалар институты Телемарафонының баш фәнни хезмәткәре, профессор Хелен Леонард да катнашачак. Табиб моннан 20 ел элек әлеге авыруны ныклап өйрәнә башлаган. 1992 елда ул Австралиядә Ретта синдромлы балаларны берләштергән уникаль база булдырган. Бүген биредә 47ләп илдән әлеге авырудан интегүчеләрнең исемлеге тупланган. Ретта синдромын өйрәнүдә базадагы мәгълүмат нык ярдәм итә.

- Казанда 2011 елдан бирле Ретта Синдромлылар берләшмәсе эшли. Әлеге берләшмәнең рәисе Ольга Тимуца бу авыру белән якыннан таныш. Аның үз кызына да әлеге диагнозны куйганнар. Ләкин бернигә дә карамастан, Ретта синдромы белән яшәргә була, ди Ольга ханым.

- Күп нәрсә табиблардан тора, әгәр алар сезнең балада сирәк очрый торган авыру һәм бу гомерлеккә дисәләр, әлбәттә, әти-әни бу хәбәрне авыр кичерә, ә авыруны җиңеп була, дип тиешле белгечләргә юлласалар, өмет чаткылары уяна, - ди ул.

Сүз уңаеннан, Казан дәүләт Медицина университеты ректоры Алексей Созинов белдергәнчә, якын арада АКШта Ретта синдромына каршы чара уйлап табарга җыеналар.

^{_{Фото: sntat.ru}}