Татарстан Президенты: «Сез гаилә институтының абруен ныгытуда лаеклы үрнәк булып торасыз»

Рөстәм Миңнеханов «Ата-аналар батырлыгы» медале белән бүләкләү турында: 10 ел эчендә күп балалы гаиләләр саны 66 процентка артты

Бүләкләү тантанасы Казан Кремлендә узды. Чара Халыкара балаларны яклау көненә багышланган иде.

Рөстәм Миңнеханов искә төшергәнчә, 5 иң яхшы гаилә парына «Ата-аналар батырлыгы» медальләре беренче тапкыр тапшырыла.

Исегезгә төшерәбез, яңа дәүләт бүләге– «Ата - аналар батырлыгы» медален гамәлгә кую карары Татарстан Президенты тарафыннан гаилә һәм ата-аналарның абруен күтәрү максатларында кабул ителде. Бүләк җиде һәм аннан да күбрәк бала тәрбияләп үстергән гаиләләргә тапшырыла.

"Бүгенге көндә күп балалы гаиләләр саны артуы куандыра. 10 ел эчендә аларның саны 66 процентка арткан. Мондый гаиләләр күбрәк булган саен, дәүләтебез ныгый, республикабыз да көчлерәк булачак!» ,- диде Татарстан Президенты.

Рөстәм Миңнеханов ассызыклаганча, бүген тулы кыйммәтле гаиләне ныгытуга һәм саклауга аерым игътибар бирү мөһим, чөнки баланы әхлакый һәм рухи яктан тәрбияләү – ата-аналарның көндәлек һәм уртак җаваплылыгы.

«Сез гаилә институтының абруен ныгытуда лаеклы үрнәк булып торасыз, ата-аналарның абруен күтәрүгә зур өлеш кертәсез. Сезгә гаилә бәхете, иминлек, үзара аңлашып яшәвегезне телим», - диде республика башлыгы. 
«Ата-ана фидакарьлеге» медаленә республикада яшәүче төрле милләт гаиләләре лаек булды.  Верниковская Рәисә Викторовна һәм Верниковский Леонид Эдуардович-ун бала әти-әнисе (Казан шәһәре), Фарваева Татьяна Сергеевна һәм Фәрваев Юрий Фәйзелхак улы - тугыз бала әти - әнисе (Баулы муниципаль районы), Сәгыйтов Гөлнара Әмир кызы һәм Сәгыйтов Фәргать Тәлгать улы - тугыз баланың әти - әнисе (Саба муниципаль районы), Искандирова Ирина Петровна һәм Искәндиров Юрий Александрович-җиде бала әти-әнисе (Кукмара муниципаль районы), Рыбочкина Лариса Юрьевна һәм Рыбочкин Андрей Анатольевич-җиде баланың әти-әниләре (Чистай муниципаль районы).