Миңнеханов Бохарада: Татарстан катнашында төзелгән сәнәгать паркы эшли башлады

Ул республика ярдәме белән төзелгән сәнәгать паркын карады. Бу хакта ТР Рәисе матбугат хезмәте җитәкчесе Лилия Галимова хәбәр итте.

Бүгенге көндә парк территориясендәге барлык җитештерү корпуслары төзелеп беткән һәм файдалануга тапшырылган. Биредә инде гидроизоляция материаллары җитештерүче предприятие эшли. Әлеге продукция авыл хуҗалыгында, су хуҗалыгында һәм экологик проектларда киң кулланыла.

Сәфәр барышында Рөстәм Миңнехановка җитештерүне киңәйтү планнары тәкъдим ителде. Моннан тыш, сәнәгать паркында эш башларга җыенган яңа резидентлар белән дә таныштырдылар. Алар арасында бетон өчен химик өстәмәләр, полиэтилен пленкалар, электр җиһазлары, күпер краннары җитештерү, шулай ук логистик үзәк булдыру проектлары бар.

Шулай ук Татарстан Рәисе Бохара өлкәсе хакиме Ботир Зарипов белән очрашты. Яклар төбәкләр арасында хезмәттәшлекне киңәйтү һәм сәнәгать паркының алдагы үсеше мәсьәләләрен тикшерде.

Билгеле булганча, Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.