Игелек экосистемасы: мөмкинлекләре чиклеләргә чиксез игътибар

Форумның төп мәйданы итеп «Московский» мәдәният үзәге сайланган. Әмма чаралар шәһәрнең башка мәйданчыкларында да үтәчәк: ресурс үзәкләрендә, коворкингларда, күнекмәләр алу фатирларында. Чарада Россия төбәкләреннән һәм 5 чит илдән 250дән артык вәкил катнашачак.

Казан Башкарма комитеты җитәкчесе урынбасары Азат Абзалов билгеләп узганча, «Игелекле Казан» – бүген инде гади сүзтезмә генә түгел, ә шәһәр тормышының аерылгысыз бер өлеше, кешеләрнең көндәлек гамәлләрендә чагылыш табучы киң колачлы социаль хәрәкәт. Ул хакимият органнарын, эшмәкәрләрне, иҗтимагый оешмаларны һәм иң мөһиме, битараф булмаган шәһәр халкын берләштерә.

Аның сүзләренчә, «Игелекле Казан» экосистемасы биш стратегик юнәлешкә нигезләнә: хәйриячелекне үстерү; коммерцияле булмаган секторга ярдәм күрсәтү; авыр тормыш хәлендәге кешеләргә булышу; волонтерлык хәрәкәтен киңәйтү; инклюзияне системалы рәвештә үстерү.

Шулар арасында иң зур әһәмиятлесе – инклюзия. Соңгы елларда башкалабызда дүрт инклюзив үзәк ачылган. Чиратта тагын берәү – «Салават күпере» микрорайонында ачылырга тора. Чөнки биредә 500дән артык мөмкинлеге чикле бала яши.  Бу үзәкләрдә «үзенчәлекле» баланы туганнан алып, мөстәкыйль тормышка аяк басканчы озата баралар. Нәтиҗәдә, ата-аналарда баланың киләчәге өчен борчу кими.
«Игелекле Казан» оешмасы директоры Татьяна Мерзлякова билгеләп үткәнчә, Казан инклюзия өлкәсендә Россиянең иң алдынгы 5 шәһәре рәтенә керә. Бездә мөмкинлекләре чиклеләргә уңайлы мохит тудырылган, балалар бакчалары, мәктәпләр һәм буш вакытны уздыру үзәкләре булдырылган.

-  Без, коммерцияле булмаган сектор вәкилләре буларак, проблемаларга хакимияткә караганда тизрәк җавап бирә алабыз. Без карарны сынап карарга, ялгышырга, аны төзәтергә һәм гаиләгә чыннан да ярдәм итәчәк әзер продукт белән чыгарга мөмкинбез, – ди Татьяна Мерзлякова.

«Игелекле Казан» форумы соңгы тапкыр 2019 елда уздырылган булган. Коронавирус пандемиясе, аннары сәяси вакыйгалар аркасында чара уздырылмый торган. Быел «Игелекле Казан» оешмасының 10 еллык юбилеен билгеләп үткән чорында, форумны кире кайтарырга булганнар.

Форум программасы берничә тематик секциядән торачак: иртә яшьтәге балалар үсеше; яшүсмерләрнең социализациясе һәм эшкә урнашуы; инвалид балаларны тәрбияләүдә катлаулы һәм тыелган темалар.

Форум кысаларында стратегик сессия узачак, анда шәһәрнең киләсе елларга үсеш юлы билгеләнәчәк. Максат – инвалид балалар өчен тулы цикллы ярдәм системасын булдыру.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.