Татарстан табиблары сирәк очрый торган диагнозлы пациентны ничек коткарган?

Мондый өлешчә транспозиция бик сирәк очрый. Әгәр дә йөрәк белән ашказаны – уң якта, ә бавыр белән талак сул якта булуы 10 мең кешенең берсендә генә күзәтелсә, йөрәге генә уң якта булган кешеләр бөтенләй дә санаулы.

Үзенең үзенчәлеге турында Илшат биш яшендә белеп ала. Поликлиника табиблары аның йөрәге уң якта урнашуын әйтә. Туганнан бирле ул табиблар күзәтүендә була, әмма тикшерүләр малайның сәламәт булуын һәм гадәти тормыш белән яши алуын раслый.

Озак еллар шулай дәвам итә. Барысы да ир яңа коронавирус инфекциясен кичергәннән соң үзгәрә. Шуннан соң хәле начарлана башлый: көчсезлек, тын кысылу барлыкка килә. Илшат моны үзенең һөнәре белән бәйли. Ул инде 15 ел эретеп ябыштыручы булып эшли, ә бу һөнәр ияләре һөнәри бронхиаль астма буенча хәвеф төркеменә керә. 35 яшьлек ир-ат ул вакытта йөрәгендә җитди проблемалар башлануы турында хәтта уйлап та карамый.

Чаллының 5нче шәһәр хастаханәсендә Илшатка тулы күләмле диагностика үткәрелә.
– Без барлык кирәкле тикшерүләрне уздырдык һәм аритмиянең йөрәкне бик тиз «туздыруын» ачыкладык. Йөрәкнең кыскару сәләтен күрсәтүче кан чыгару фракциясе нибары 31 процент кына иде, ә норма 55–70 процент тәшкил итә. Хроник йөрәк җитешсезлеге үсеш ала, аның фонында бөерләр һәм бавыр эшчәнлеге дә какшый башлады. Кан басымы даими төшә, тын кысылу көчәя барды, пациентка хәтта хәрәкәтләнү дә авырлашты, – дип сөйли Чаллының 5нче шәһәр хастаханәсенең хроник йөрәк җитешсезлеге кабинеты мөдире Альбина Бәшәрова.

Тәҗрибәле кардиолог вакытны сузарга ярамаганын аңлый. Яшь пациентның гомерен саклап калу өчен тиз арада дөрес дәвалау тактикасы сайлана. Башта аның хәлен тотрыклыландыралар, аннары академик В.И.Шумаков исемендәге Трансплантология һәм ясалма әгъзалар илкүләм медицина тикшеренү үзәгенә юллау өчен кирәкле документлар әзерләнә.

2023 елның октябрендә Илшатка электрокардиостимулятор урнаштыралар һәм абляция ясыйлар. Җайланма йөрәкнең яңа, тотрыклырак ритмына – минутына 80 тибешкә көйләнә. Нәтиҗә озак көттерми: йөрәкнең кан чыгару фракциясе 51 процентка кадәр күтәрелә, тын кысылу кими, гомуми хәле сизелерлек яхшыра.

Әмма ирешелгән нәтиҗәне саклап калу өчен даими табиб күзәтүе кирәк. Инде ике елдан артык Альбина Бәшәрова Илшатка күз-колак булып тора. Ул ай саен консультациягә килә, анализлар тапшыра, тикшеренүләр үтә. Йөрәк, бөерләр һәм бавыр эшчәнлеге күрсәткечләренә карап дәвалау даими рәвештә көйләнеп тора. Аеруча организмдагы натрий дәрәҗәсе контрольдә тотыла. Бу электролит су-тоз һәм кислоталы-селтеле тигезлекне саклауда, шулай ук йөрәк-кан тамырлары системасының дөрес эшләвендә мөһим роль уйный.

– Без Илшатның йөрәгенә тибәргә бергәләп ярдәм итәбез. Ул үзе дә бик җаваплы пациент, барлык киңәшләрне төгәл үти, – дип елмая табиб.
Дәвалануның һәр этабында Илшат янында иң якын кешеләре – тормыш иптәше Гөлназ, кызы Азалия һәм улы Әмирхан көч биреп тора.