Айгөл Миндиярова: «Бик борчылдым инде»

Җырчы шатлыклы хәбәрен белән социаль челтәрдәге язылучыларына хәбәр итте. Без дә сөенечле хәбәр белән уртаклашып, җырчы белән хәбәргә чыктык.

– Котлыйбыз, Айгөл! Тәүге тапкыр әни булгансыз. Йөклелек вакыты ничек узды?
– Бик зур рәхмәт котлауыгыз өчен! Йөклелек вакытым бик авыр үтмәде. Шәхси клиникада тикшеренеп тордым. Витаминнар җитмәгән вакытлар булгалады, әмма табиблар карап торгач, без барысын җайладык.  Мин 9 айга кадәр рәхәтләнеп эшләдем, Сабантуйларны да ерып чыктым. Бер ике-өч атна калгач, эшләрне туктаттым, хәзер тагы эшләсе калган икән дип уйлыйм (көлә). Чөнки көчем бар иде, табиблар да “ярамый” димәде. Дөресен әйткәндә, әти-әниләр минем өчен борчылды, шуңа гына эшләрне туктаттым. Үземнең туган җирем Башкортостанда, Уфа шәһәрендә бала таптым. Әти-әниләр дә янда булгач, беренче вакытта җиңелрәк булыр дип уйладым.

– “Әкрен генә аңыма киләм”, – дип язгансыз. Беренче тапкыр әни булганда нинди хисләр кичердегез?
– Чыннан да, бик борчылдым инде. Әни әйтмешли: “Баланы кулга алмыйча йөрәк тыныч булмый инде”. Куркып торасың. Йөклелек вакытында Коръәнне дә укыдым. Иң изге теләкләр теләп торадым. Бик яхшы табиблар кулына эләктем. Бала табарга ярдәм иткән Эльвира Фаритовнага бик зур рәхмәт! Җайлы гына үтте барсыда... Авырту үзенекен эшли, әлбәттә. Шулай да табибларны  тыңларга тырыштым, җиңеп чыктык. Әледә ышана алмыйм. “Мин моны үттемме соң?” – дип уйланам, барысы төштә кебек. Сабыем белән көч җыябыз.

– Элек Салават Фәтхетдинов төркемендә җырладыгыз. Хәзер дә берәр артист белән эшләргә теләк юкмы?
– Юк, башка артистлар белән эшләргә теләгем юк. Үземнең сольный концертымны куярга максат куйдым, шуңа барам. Әле фатирда ремонтта баргач,бәби дә алып кайткач ул бераз гына тукталып калды.

– Кызыгызга нинди исем сайладыгыз?
– Кызыма Айлин исемен сайладык.

– Шәхси тормышыгыз турында сөйләмисез.  Кияүгә чыкканыгызны бәлки белми калганбыздыр? Баланың әтисе нинди өлкә кешесе?
– Шәхси тормышым минем һәрвакыт сер булды инде. Шунысын әйтәм ул сәнгать кешесе тугел. Бик ерак бу өлкәдән.