Алинә Даутова: «Шунысы кызык: кызлар бер көнне тудылар, айлары гына төрле»

«Документларым гел үзем белән иде»

Җырчы белән хәбәргә чыгып, аның шатлыгын уртаклаштык.

— Әле күптән түгел генә дәртләнеп биеп йөри идең, котлыйбыз! Бала табу вакыты килеп җитәсен белгәнсеңдер? Курку булмадымы?

— Курку булды, әлбәттә. Беренче бала белән әле өйрәнәсең генә, ә икенче бала белән инде кая барасыңны беләсең. «Ничек булыр икән? Ашыгыч әйбер килеп чыкмасмы?» —дип борчылдым. Балалар тудыру йортына киткәнче машинада үзем йөрдем. Алай-болай була калса, документларым гел үзем белән иде.

— Икенче тапкыр әни булу нинди хисләр уята?

— Икенче тапкыр әни булу бөтенләй үзгә икән. Беренче баламны тапканда яшьрәк идем, анысы да сизелә. Ике бала булгач, олы кызыма да игътибарны киметмәскә тырышам. Сабый балага игътибар күбрәк китә инде. Әмма олы кызым да минем яратуымны сизсен, күрсен дип тырышам. Кызымны сеңлесен яратырга өйрәтәм. Сөйләшеп, аңлатып торабыз.

«Бу, чыннан да, Севиль» , — дидем

— Кызың ничек соң, шатланамы?

— Аллаһка шөкер, бик шатлана. Мин хастаханәдә булганда: «Минем аны күрәсем килә, кочаклыйсым килә», — дип шалтыратып торды. Балаларның яшь арасы 11 ел диярлек. Сәфинәгә тиздән 11 яшь тула. Шунысы кызык: кызлар бер көнне тудылар, айлары гына төрле.

— Көтеп алынган бала икәнен дә беләбез, нинди исемгә тукталдыгыз? Һәм кем сайлады?

— Гадәти исем кушасы килмәде. Хәзер элеккеге исемнәрне кушалар йә бик заманча исемнәргә тукталалар. Без алтын уртаклыкны эзләргә тырыштык. Кызыма бик сирәк очрый торган исем сайлыйсы килде. Туганыбыз Севиль исемен тәкъдим итте. Безгә ошады. Бу гарәп исеме. Тәрҗемәсе: яраткан, яратылган дигәнне аңлата. Балага исем туры килүе тугач ук күренә. Кызыбызга карагач: «Бу, чыннан да, Севиль» , — дидем.

— Үзеңнең хәлең ничек?

— Аллаһка шөкер, әкренләп тернәкләнеп киләбез. Бала табу — кибеткә бару түгел инде. Аның үз авырлыгы. Тулаем, бик профессиональ коллектив кулына эләктем. Табибларга бик зур рәхмәт, гел ярдәм итеп тордылар. Үзем дә гел бары яхшыны уйларга тырыштым. Балаларыбызга бәхет, саулык-сәламәтлек бирсен!