Марат Яруллин мөнәсәбәтләренә ачыклык кертә

Бу хакта ул социаль челтәрләрдә яза.

– Гастроль туры тәмамлангач, минем турында әйтелгән сүзләргә ачыклык кертергә вакыттыр. Бер якның гына фикерен тыңлап, бөтен ситуацияне белмичә, фикер йөртүләре кызык. Әмма бу сезнең хокук, сезнең алда акланырга уйламыйм. Кемдер хайп ясады, кемдер язылучылар, сатып алучылар санын арттырды. Гәрчә, бу хәл аларга берничек тә кагылмый. Әгәр сезнең килеп чыккан икән, рәхмәт әйтеп тормагыз, Аллаһ ярдәм бирсен. 

Кемдер кавыша, кемдер очрашып йөри, кемдер аерылыша. Тормышны алдан фаразлап булмый. Бәлки, сезнең тормышта да барысы идеаль түгелдер. Ачулы комментарийлар язганчы бу энергияне үзегезгә һәм гаиләгезгә сарыф итү яхшырак булмасмы?

Әгәр сез моның белән мине "сындыра" алырмын дип уйлыйсыз икән, ялгышасыз. Сезнең кемдер белән "тагылган" фикер язуыгызга бөтенләй битараф. Моңа өстәп әгәр сез икенче якка теләктәшлек белдерергә телисез икән, концертларына йөрегез, залларын тутырыгыз. Һәм аңа бу концерт сезонындагы кебек планлаштырган концертларын үткәрмичә калырга туры килмәс иде.

Иҗатыма кагылышлы да ачыклык кертәсем килә. Мин 80гә якын җыр чыгардым. Бу җырларны сез яратасыз, кушылып җырлыйсыз. Һәм алар арасында 4 җырга Ильмира көй язды: 2 дуэт җыры һәм 2 мин башкара торган җыр. Әлбәттә, бу җырлар артист буларак минем карьерамда зур өлеш алып тора. 2021 елда чыккан "Соңгы бию" бүген дә иң күп тыңланучылар рәтендә, ә "Сау бул, мәктәп" чыгарылыш кичәсе гимннарына әйләнде. Һәм мин бу җырларны иҗат итүдә, яздыруда катнашкан һәркемгә рәхмәтле. Сүз авторлары, аранжировка осталары, җырны яздыручылар, башкаручылар һәм, әлбәттә, талантлы композитор - Ильмира Нәгыймова. 

Бу дөньяда беркем дә популяр булып тумый. Популярлык, уңыш артында йокысыз төннәр, тырышлык ята. Беркемне дә юктан гына популяр ясап булмый, моңа миллионнар да ярдәм итмәячәк, әгәр кеше моны үзе теләмәсә. 

Мин кечкенә генә авылда тудым һәм кечкенәдән зур сәхнәдә чыгыш ясарга хыялландым. Үз юлымны район концертларыннан башладым. Тырышлык, үз-үземә ышану һәм, әлбәттә, тамашачыларның ярдәме белән бүгенге нәтиҗәләргә ирештем. Беләм, миңа әле эшләргә дә эшләргә. Шаккаттырырга, иҗат итәргә кирәк. Аның өчен минем барысы да бар: яраткан гаиләм, көчле командам, тугры һәм яраткан тамашачым. 

Мөнәсәбәтләргә килгәндә, тездән түбән төшеп, шәхси әйберне сөйләргә җыенмыйм. 4 ел бергә булган кеше турында начар сөйләргә намусым ирек бирми. Бу вакыт эчендә бик күп яхшы мизгелләр булды. Минем өчен бу бушка, мәгънәсез үткән вакыт түгел. 

Тулаем, элек очрашканнар турында йә яхшы итеп сөйлиләр йә берничек тә сөйләмиләр. Барыгызга бәхет телим, сезнең тормышта игелек күбрәк булсын иде. Беребез дә бу дөньяга мәңгегә килмәде, - дип яза Марат.