Мошенниклар Ринат Рахматуллиннан 3 миллион сум акча таләп иткән

Мошенниклар видеоны дөньяга чыгарыр алдыннан Ринаттан 3 миллион сум акча сораган, әмма җырчы аларга акча бирмәгән. Нәтиҗәдә видео яшен тизлегедәй социаль челтәр буенча тарала.

Бу хакта Ринат видеомөрәҗәгать яздырып социаль челтәргә урнаштырды.

“Минем иҗатыма сокланып, яратып яшәүче тамашачыларым, дусларым да, иҗатымнан, шәхси тормышымнан көнләшеп яшәгән кешеләр дә бар. Ничә еллар дәвамында сизеп киләм: миңа янаган кешеләр дә, иҗатыма, шәхси тормышыма кагылган сүзләр дә булды. “Без сине халык алдында мыскылга калдырабыз әле”, - дигән сүзләр дә әйтелде. Күптән түгел миңа янаган шушы жуликлар, янәсе, минем белән булган видеоны социаль челтәргә, төрле төркемнәргә куйдылар. Ул видеоны чыгарыр алдыннан таныш булмаган номердан шалтыратып, видеоны чыгармас өчен миннән 3 миллион сум акча сорадылар. Мин ул акчаны бирмәдем, полициягә мөрәҗәгать иттем. Жуликлар ул видеоны чыгарды. Шуны әйтәсем килә: бу эшне балачага гына эшләмәгән, компьютерда профессионаллар эшләгән эш бу. Хәзерге заман мөмкинлекләре белән теләсә кайсы кешенең тавышын, йөзен үзгәртеп була. Техника шулкадәр көчле. Бу жуликларны полиция хезмәткәрләре белән берлектә тоткарладык, алар хәзер кулда, аларны тикшерәләр. Кем бу видеоны үзенең төркемендә чыгарган, ул администраторлар да җаваплылыкка тартылачак. Бу хәлне анализлап, дөрес фикердә калырсыз дип ышанып калам”, - ди Ринат Рахматуллин.