Нәфисә Хәйруллина сәхнәгә кайта: “Мин Айдар артыннан бардым”

Нәфисә Хәйруллина 9 еллык тәнәфестән соң, сәхнәгә кайта. Ул Айдар Җаббаровның Хәсән Туфанның тормыш иптәше актриса Луиза Салиаскарова турында спектакльдә төп рольне башкарачак. Луиза белән Хәсән Туфан 6 ел да 6 ай бергә яшәп калалар. Луиза Салиаскарова ирен кулга алганда, кызы Гөлгенә һәм кечкенә уллары Идегәй белән ялгыз кала. Туфанны халык дошманы дип гаепләгәч, Луиза Салиаскарованы театрдан куалар, ул эшсез һәм акчасыз кала. Илдә Бөек Ватан сугышы бара. Ул чакта Казанның һәр мәктәбендә госпиталь була. Яралыларның тормышын саклап калыр өчен, кан кирәк, димәк, донорлар да. Кан бирергә килгән кешеләргә, күп булмаса да, азык-төлек бирәләр. Луиза Салиаскарова кан биреп, җыя алган кадәр ризыкны иренә – башта төрмәгә, аннан ул сөрелгән лагерьга посылкалар белән җибәрә. Хәсән Туфанга Казанга кайтырга 1956 елда СССРның Генераль прокуратурасы тарафыннан тулысынча акланганнан соң гына рөхсәт итәләр. Луиза Салиаскарова исә, 1955 елда вафат була.

Спектакльдә Нәфисә Хәйруллина уйнаячагы турында Тинчурин театрының матбугат үзәге хәбәр итте. Алар җәһәт әңгәмә дә корганнар.

– Нәфисә Хәйруллина Тинчурин театрында нишли икән?
– Без Айдар Җаббаров белән спектакль куябыз. Бик дулкынланам, борчылам. Мин бит 9 ел 
декрет ялында булдым. Мин Хәсән Туфанның хатынын – Луизаны уйнаячакмын. 

– Актерлар форманы тиз югалта диләр?
– Белмим, карап карарбыз инде. Бөтен өмет Айдарда. 50 процент өмет анда инде. 

– Сез хәзерге Тинчурин театры бинасында эшләп киткән кеше. Үзегезне туган йортыгызга кайткан кебек хис итәсезме?
– 50гә 50. Мине монда бик яхшы каршы алдылар, үз актрисаларын кебек. Бәлки штатка керерсең дип әйттеләр. Киләчәктә дә эшләргә җиңел булыр дип уйлыйм. 

– Бүген нәрсә белән мәшгуль сез?
– Әлегә спектакль белән. Уйнавымны белгәч, бик күп кеше яза башлады. “Сез кайтасызмы? Ура! Билетларны алдан алып куярга кирәк. Нинди чәчәкләр яратасыз?” һәм башкалар. 

– Тинчурин театрының  яңа спектаклен караганыгыз бармы?
– Әлбәттә. “Казан егетләре”н карадым. Бик сәләтле яшь актерлар. Бер сулышта карадым.

– Бәлки, үзегезнең дә катнашасы килеп киткәндер?
– Юк, мин карт ул спектакль өчен (көлә).

– Татар сәхнәсе сагындырдымы?
– Бик сагындым. Тамашачыларны сагындым. Безнең тамашачылар рәхмәтле була белә. Дөресен әйткәндә, мин Айдар артыннан бардым инде. Бик хөрмәт итәм, сәләтле режиссер.