Ришат Фазлыйәхмәтов: «Быел 12 Сабан туенда чыгыш ясадым, тагын өчесе көтә»

Ришат белән дә җәһәт әңгәмә кордык.

– Сәхнәгә балаларны меңгереп тә биеттең. Яраталар сине!
– Балалар – оҗмах кошлары. Аларны алдап булмый. Сәхнәдә малай белән кызларны парлап, салмак бию дә биеттем. Кечкенәдән үк егетне егет итеп, кызны кыз итеп күреп үссеннәр. 

– Сабан туйлары күп, шөкер. Авыл Сабан туенда да эстрада йолдызлары чыгыш ясый. Моңа ничек карыйсың?
– Иганәчеләр мөмкинлекләре булгач, җырчыларны да чакыралар. Бәйрәмне бизәп, халыкны сөендереп китү дә яхшы. Иң беренче чиратта шәп бүләкләр алып, авыл халкын хөрмәтләсеннәр иде. Ә аннан инде мөмкинлектән чыгып, җырчыларны да чакырарга була. 

– Көрәш белән шөгыльләнмәдеңме?
– 10нчы сыйныфка кадәр көрәштем. Аннан микрофон җиңелрәк бит дип, ташладым. Сабан туенда мөмкинлегем булса, карарга тырышам. Күпвакытта җитешмим, чөнки чыгышка әзерләнәм.

– Яңа сезонга әзерләнәсеңме?
– Сентябрьдән башларга, Аллаһы бирса. Татарстан районнары буенча да, Россия төбәкләре буенча да гастрольләр була. Казанда “Пирамида” концертлар залында да зур концерт ясарга исәп. 1 ноябрь планлаштырып торабыз. Әлегә программа әзерлибез, җырларны туплыйбыз.