Ришат Фазлыйәхмәтов: “Ике әби дә бик шәп кешеләр, аларны хөрмәт итәм”

Моңа кадәр оештыру эшләре белән күбрәк тормыш иптәше Эльмира шөгыльләнә иде. Аралары суынганмы? Әллә Фазлыйәхмәтовларның куанычлы яңалыгы бармы? Ачыклык кертү өчен Ришат белән хәбәргә чыктык.

– Ришат, Эльмира синең концерт директоры иде бит. Хәзер яңа кеше алгансыз икән. Ни өчен?
– Эльмира элек тә концерт директоры түгел, ә продюсер булды. Әйе, концертларны бергә эшләп килдек. Ә хәзер инде тәҗрибәле, ышанычлы кеше таптык. Концерт оештыру эшләре белән хәзер ул шөгыльләнәчәк.  

– Хастаханә юлын да таптадыгыз. Әллә Эльмира йөклеме?
– Бераз тикшеренергә туры килде шул. Эльмирага операция ясарга ңа туры килде. Хәзер барысы да, Аллаһка шөкер инде.  Йөклеме әллә юкмы дигән сорауга килгәндә, әлегә сер булып калсын. Быел Казанда зур концерт куярга исәп, шунда, серне чишәрбез.

– Ришат, концертлар белән йөрисең хәзер. Тамашачыны җыю кыенмы?
– Быел, Аллаһка шөкер, концертлар саны артты. Гастрольләр мохите сагындыра икән. Иҗатны яраткан тамашачы һәрвакыт карап, белешеп тора. Концерт буласын белгәч, әлбәттә, килә. Иҗатыңны яратмаган болай да килеп тормый. Андый кешеләр дә булырга тиеш, һәркемгә ошап, ярап бетеп булмый бит.

– Синең фанатларың өлкәннәр күбрәк диләр. Хакмы?
– “Концертка өлкән яшьтәгеләр генә йөри”, – дип әйтмәс идем. Иллегә илле. Яшьләр өчен дә җырлар булгач, алар да тартыла. Яшьләр дә йөри, өлкәннәр дә йөри.

– Ришат, син Чаллы кияве бит. Кайнанаң белән мөнәсәбәтләр нинди?
– Кайнана дип эндәшмим. Эльмираның әнисенә яратып “әби” дип дәшәм. Мин ике тапкыр әбиле булдым. Элеккеге тормыш иптәшемнең әнисе дә Чаллыдан. Ике әби дә бик шәп кешеләр, аларны хөрмәт итәм. Аллаһ бирса, 7 апрель Чаллыга концерт белән дә кайтам. Әби белән күрешәбез. Эльмираның әнисе бик кунакчыл, без кайткан саен әзерләнеп тора, гел сый-хөрмәттә.  Мин – бәхет кияү.

– Ришат, шулай да сиңа кызлар да игътибар итәдер. Социаль челтәрдә танышырга теләп язучылар бармы?
– Социаль челтәрләрдә язучылар бар инде. Бу иҗат кешесе өчен гадәти хәл. Җавап бирергә тырышам. Ләкин якын килергә теләүчеләргә: “Бик зур рәхмәт, әмма йөрәгем буш түгел”, – дип кенә язып җибәрәм. Язучылар бар, күрәсең, ошаталар инде.