Җырчы Илсаф: “Миңа 60 икән бит”, – дип уйлап куясың”

Без дә җырчыны котлап, аның белән җәһәт әңгәмә кордык.

–  Үзегезне 60 яшькә хис итәсезме? Гомумән, бу яшьтә бераз үткән юлны да барлыйсың. Үткәннәргә кайтып булса нәрсәне үзгәртер идегез?
– Үземне 60 яшькә бер дә хис итмим. Документларны барлаганда гына күз төшә. “Миңа 60 икән бит”, –  дип уйлап куясың. 60ка җитү борчулы хәбәр түгел бит. Аллаһка шөкер, шушы яшькә җиткәнмен, сөенергә кирәк.  Энергия бар, эшләргә дә эшләргә әле.

–  60 яшьне туган якларда үткәрергә уйлагансыз. Ни өчен? Артистлар теләп кайттымы? 
– Әйе, юбилей концертларын туган яктан башладым. Туган авылым Яңа Кәкерледә башта Коръән ашы үткәрдек. Бөтен авылдашларны, кайткан кунакларны чакырдым. 200ләп кеше җыелдык. Район үзәгендә күмәк җыелма концерт бирдек. Чүпрәлегә кайткан артистларга барысына зур рәхмәт. Шалтыраткач ук: “Кайтабыз”, – диделәр. Аннан концерттан соң да, аш өстәленә җыелдык. Ике казан җылы аш әзерләдек. 90лап кеше булдык. Тулаем, юбилей бик күңелле үтте. Әле бу башы гына, тагын концертлар булачак, Аллаһ бирса. 

– Балалар, оныклар җыелыштымы? Юбилей гаилә бәйрәме дә бит.
–  Балалар да җыелып кайтты. Оныклар гына кайтмады. Алар Казан концертына килә. Бәлки, Казан концертында оныгым Сәфинә белән дуэт та җырларбыз. “Яратыгыз балаларны” дигән җыр өстендә эшлибез. Казан концертлары сентябрь башында була. Хит-җырдагыча әбиләр чуагына туры китереп эшләдек. 

– Соңгы елларда дин юлына басканыгызны беләбез. Иҗатка карашлар үзгәрдеме? 
– Иҗатка караш үзгәрмәде. Гомумән, җыр мәгънәле, көе матур, моңлы булса, башкарам. 

– Сез авыл хуҗалыгы институтында укыган кеше. Көннәрдән бер көнне авылга кайтып, шәһәрне онытасы килгән мизгелләр буламы?
–  Шәһәр тормышын бөтенләй онытып булмый инде. Шулай да, яшь бара. Күңел тынычлыкка ашкына. Шәһәрдән 20 километр ераклыкта гына үз йортым бар. Авылны сагынганда күбрәк анда барам. Үлән үскән, шуны чабып, ял итеп килдем. Мунча керү –  шәп ял.

– Берәр бизнесыгыз юкмы? Хәзер җырчыны иҗат түгел, җырчы иҗатны ашатырга тиеш кебек. Бәяләр арта бит?
– Бернинди бизнесым да юк. Иҗат белән яшим. Кайбер җырчылар бизнес башлап карады. “Иҗатка вакыт калмый. Мәшәкате дә күп булды”, – дип кире иҗатка чумдылар. Хәзер эшмәкәрләргә дә җиңел түгел. Гомумән, һәр эшнең үз авырлыгы.