Ремонт вакытында фатирдан буяу исе килеп торса

Сорауга адвокат Марат Гайнуллин җавап бирә. 

Әгәр күршеләре шикаять язса, һавададагы зарарлы матдәләрнең рөхсәт ителгән концентрацияләре артуын Роспотребнадзор белгечләре тикшерергә мөмкин.
Фатирдан лак, грунтовка, эреткеч исе шунда ук сизелә, бигрәк тә вентиляциясе начар эшләгән иске йортларга хас бу күренеш. Канунда бу аерым хокук бозу дип тасвирланмый, ә беренче чиратта сәламәтлеккә һәм санитария таләпләрен үтәүгә карый. Штраф ике очракта мөмкин. Беренчесе санитария нормалары белән бәйле. Әгәр күршеләр шикаятеннән соң Роспотребнадзор белгечләре яңа гына ремонт ясалган фатирдан һава пробаларын алса, ахыр чиктә торак бинада зарарлы матдәләрнең рөхсәт ителгән концентрациясе артуын теркәсә, ул вакытта санитария кагыйдәләрен бозу турындагы маддә буенча җәлеп итәргә мөмкиннәр. Гражданнар өчен штраф мең сумга кадәр тәшкил итә.

Буяу исе таралуның икенче варианты фатир остаханә буларак кулланса, мәсәлән, хуҗа даими рәвештә җиһазларны яки ишекләрне заказга буяп тора, сәнәгать эмальләрен һәм эреткечләрне куллана. Мондый очракларда контроль органнары бер тапкыр ремонтлауны гына түгел, ә торак бинадан законсыз файдалануны һәм башкалар өчен яшәү шартларын системалы рәвештә бозуны бәяли. Ул вакытта санитария маддәсеннән тыш торак урыннардан файдалану кагыйдәләрен бозу турындагы норманы кулланырга мөмкиннәр. Гражданнар өчен штраф 2,5 мең сумга кадәр тәшкил итәчәк.