Россия чемпионатында Татарстан җыелмасы 10 түгел, 11 көрәшче белән көрәшә башлый...

Иртәгә Казанның «Ак Барс» Көрәш сараенда көрәш буенча Россия чемпионаты узачак. Татарстан җыелма командасы данын әлеге бәйгедә Илфат Миннегалиев, Ильяс Юсупов, Илдус Камалов, Рафаэль Бильданов, Илназ Рамазанов, Булат Москов, Эмиль Мавлин, Ренас Кәлимуллин, Булат Мусин, Радик Сәлахов, Муса Галләмов яклаячак. 10 үлчәү категориясендә узасы ярышта 11 көрәшчебез катнаша башлаячак. Ни өчен? Чөнки 85 кг.да Теләче районы командасы данын яклап Татарстан чемпионы булып танылган Артур Зөлкәрнәев Татарстан җыелмасы өчен көрәшмәскә булган.

Спорт принцибы ягыннан карасак, теге яки бу спортчы көрәшә алмаса, аның урынына икенче номер чыгыш ясарга тиеш. Татарстан чемпионатында икенче урынны Әлмәт егете Булат Москов яулаган иде. Димәк, ул көрәшергә тиеш. Ләкин исемлеккә Теләче егете Эмиль Мавлин да кергән. Ни өчен икәнлеген аңлап бетермибез. Ни булса да, иртәгә Россия чемпионатында бу ике егетне көрәштереп, ахыргача Татарстан командасы данын яклап көрәшәчәк егетне ачыклаячаклар. Менә шундый хәлләр.

Татарстан чемпионатыннан соң Артур Зөлкәрнәевка мактау сүзләре язып ташлаган идем. Бу очракта мактарга да, тәнкыйтьләргә дә белмим. Башка төбәктә яшәп, кайсыдыр команда өчен чыгыш ясарга һәм, әлбәттә, җиңәргә теләвенә Артур гаепле дә түгел. Чыккан – чыккан көрәшә инде, җиңәргә дә омтыла. Гәрчә, моңарчы бик күп башка төбәк егетләренең Россия чемпионатында үз төбәкләре өчен көрәшүләрен истә тотып, көчле булган очракларда да оттыру күренешләре булгалый иде. Быел алай булмады. Ахыр чиктә, нәтиҗәсе дә без теләгәнчә булмады…

Сүз уңаеннан, көрәш буенча Россия чемпионаты быел 55 тапкыр оештырыла икән. Зур һәм күркәм дата. Ярышлар барышында оештыручылар күңелле мизгелләр дә вәгъдә итәләр. Әйтик, Россия чемпионатларында күп тапкырлар җиңү яулаган Раил Нургалиев (10 җиңү), Сергей Павлик (9 җиңү), Ренас Кәлимуллин (8 җиңү) кебек батырларны бүләкләү чарасы да каралган.