Стадионга исем эзлик

«Татмедиа» басма һәм массакүләм коммуникацияләр буенча республика агентлыгы Казанда 2013 елгы Универсиаданы ачу һәм ябу тантаналары, 2018 елда футбол буенча дөнья чемпионаты уеннары үткәрү өчен төзелә торган 45 мең урынлы стадион исеменә бәйге игълан итте. Бәйге ике этапта уздырыла. Аның беренче туры 18-24 гыйнварда үткәреләчәк. Аның кысаларында теләге булган һәркем электрон почта аша pr@tatar-inform.ru адресына («Татар-информ» агентлыгы - бәйгене оештыруга җаваплы) «Бәйгегә» дип язып, исем җибәрә ала.
Бәйгенең икенче этабы 25-30 гыйнварда уздырыла. Бу этапта «Татар-информ» сайтында беренче тур йомгаклары буенча тәкъдим ителгән стадион исемнәре өчен ачык тавыш бирү булачак.
Бәйгедә җиңүчегә стадионны ачу тантанасында кыйммәтле бүләк тапшыру күздә тотыла.