Халыкара аренага кайту процессы дәвам итә

Очрашу 97:75 исәбе белән тәмамланды.

Тамашачыларны Winline компаниясе әзерләгән махсус программа белән каршы алдылар. Турнирның төсләренә туры китереп паркетта да үзгәрешләр бар иде. Атмосфера регуляр чемпионат уеннарыннан аерылып тора. Казан командасының капитаны Дмитрий Кулагин: "Мондый төр ярышлар миңа ошый, бераз үзгәрешләр дә керткәннәр оештыручылар. Уен алдыннан махсус чаралар да бар иде. Кечкенә чакта НБА карап үскәч, атмосфера ягына бик нык игътибар итәм"- диде уенны шәрехләп.

Казан командасы беренче өч чиректә үзен өстенлекле яктан күрсәтте. Уенның соңгы ун минуты алдыннан исәп 74:47 иде. УНИКС баскетболчылары һөҗүмнәр вакытында төрле алымнар кулланып тупны боҗрага кертә барды. Берничә тапкыр "данк"лар кертеп, тамашачыны таң калдырдылар. Уеннан соң УНИКС командасының баш тренеры Велимир Перасович уенның җитешсез якларын билгеләп үтте: "Команда соңгы чиректә көндәшләргә бик күп ирек бирде. Керттергән 28 очко да моны дәлилли. Әлбәттә, болай ярамый, соңгы минутларга кадәр уйнарга кирәк".
Дөрестән дә, 18, 14, 15 туп керттерделәр Казанлылар беренче өч чиректә, ә менә дүртенче чиректә бу сан 28гә җитте. 
Иң күп очко җыючыларга килгәндә: Маркус Бингэм (20 очко, 9 подбор), Джален Рейнольдс (18 очко, 7 подбор), Дмитрий Кулагин (16 очко, 1 подбор). Велимир Перасович журналистларның Алексей Шведка булган игътибарына карата үз фикерен белдерде: "Әйе, ул атаклы спортчы. Әмма без команда һәм барысы да үз өлешен максималь рәвештә кертә. Алексейда гына тукталып калырга кирәкми".

Бу уеннан соң УНИКС Б группасында үзенең лидерлык позициясен ныгытты. Киләсе уен 16 декабрь МБА-МАИ(Мәскәү) командасына каршы булачак.

Илнар Камаев