Чулпы, муенсалар ясаучы Дамира Гәрәева: "Эшкә дә үзем иҗат иткән милли алка, беләзекләрдән йөрим"

Ә үзе көн дә эшкә милли алка, беләзекләрдән йөри. Болардан тыш милли бизәкле галстуклар да тегә. Аны заказга да бик еш бирәләр икән.

Дамира тумышы белән Питрәч районының Татар Казысы авылыннан. Бүген гаиләсе белән Казанда яши. Ире дә иҗат кешесе – гармунчы. Бер кыз һәм ул үстерәләр. Дамира күп еллар мәктәптә татар телен укыткан. Хәзер балалар бакчасында укыта.  

Буш вакытларда исә иҗат итәргә ярата. Милли бизәнү әйберләрен төрле материалдан эшли ул. Махсус металл нигездән  алка, чулпы, муенсалар җыя. Милли бизәкләр формасында киселгән агач эшләнмәләрне буяп, шулай ук брошь, алка-муенсалар иҗат итә. Ә татар изүләре, милли галстукларны, беләзекләрне чех сәйләннәреннән чигә. 

– Иҗат иткәндә кешене кабатларга яратмыйм. Үрнәкләрне үзем уйлап табам. Күңел биреп эшләгән эшләнмәләрне башта таныш-белешләр, дуслар алса, хәзер заказлар Татарстаныбыздан читтә яшәгән милләттәшләребездән дә килә. Бигрәк тә Әстерхан татарлары белән элемтә көчәйде. Башкортстан, калган төбәкләргә дә почта йөреп кенә тора. Бер көнне Иркутскига хәтле җибәрдем, – ди әңгәмәдәшем.

Кул эшенә осталыгы әнисеннән килгән. Әнием кечкенәдән кул эшенә өйрәтте, ә хәзер мин кызымны өйрәтәм, ди. 

–  Иҗат дөньясында миңа рәхәт. Анда ямьсезлек тә, гаделсезлек тә юк. Музыка куясың да тыныч кына эшләп утырасың. Көн дәвамында булган борчу-үпкәләр, проблемалар, арыганлык та онытыла, – ди ул.

Соңгы вакытларда Дамира скрапбукинг техникасы белән кызыксына башлаган. Алардан эшендә файдаланыр өчен методик кулланмалар ясый. Тынгысыз җанлы, бетмәс-төкәнмәс энергияле, уңган-булган Дамира төрле конкурсларда катнашырга да вакыт таба. Аның кул эшләре шәһәр бәйгеләрендә беренче-икенче урыннарны ала. Шушы көннәрдә “Ел тәрбиячесе” бәйгесенә әзерләнеп йөреше иде. Ә без аның җиңүче булачагына бер дә шикләнмибез. Уңышлар сиңа!