Әнисе бүләк иткән бер чәчәктән башланган мавыгу 350 төрле дәлиягә әйләнгән

Лилия — чәчәкләр коллекционеры, бакчасында 350 гә якын төрдәге дәлияләр үсә. 

— Бу мавыгу унбиш еллар элек әнием бүләк иткән дәлияләрдән башланды. Ул чәчәкләр ярата иде, 20гә якын төрдә дәлияләр үстерде. Ул вакытта аларның исемнәрен дә белми идек. Миңа бүләк иткәнен дә үзара сары төсле, энә сыманы дия идек. Соңрак кына аның Йеллоу Стар икәнен белдем. Әлеге сортны, әни истәлеге дип, әле дә үстерәм, — ди ул. 

«Банк эше» һөнәрен үзләштерсә дә, башка юнәлешне сайлаган — социаль ярдәм өлкәсендә эшли. Буш вакытын чәчәкләренә багышлый. Беренче мәлләрдә аларны үзе өчен генә үстерсә, социаль челтәргә куйган фотларыннан күреп, кызыгып сораучылар булгач, артыкларын сата башлаган. Ул акчага яңа төрле сортлар ала. Шул рәвешле коллекциям дә зурая бара, ди Лилия. Коллекциясендә кечкенә шар сыманнарыннан алып гигант зурлыктагылары да бар. 

Буталмас өчен, язын утыртканда ук сортның атамасы язылган тамгалар куеп чыга.

Дәлияләр бакчасының 5 сутый мәйданын алып тора. Йортлары, башка корылмалары һәм ике теплица куелган участокның гомуми мәйданы 13 сутый дип исәпләсәк, аның якынча яртысын дәлияләр алып тора. Мин аны дәлияле җәннәтем дип атыйм, ди бакчачы.
Бу көннәрдә Лилия бакчасын кышка әзерли.

«Кырауларны көтеп торам да, берничә көннән бүлбеләрен казып алам. Яхшылап юып, бүлгәләп, 5-10 минут фунгицид эремәсендә тотам. Аннары берәр сәгать тирәсе киптереп, агач чүбе салынган пакетларга тутырып, яхшылап бәйләп, өй базына төшереп куям. Яз көне туфрак җылынгач, бакчага чыгарып утыртам», — дип җиңел генә сөйләсә дә, моның никадәр мәшәкатьле эш икәнен ул үзе генә белә.

«Бакчада чәчәкләр арасында йөргәндә, бөтен арыганнарым онытыла, ял итәм. Дөресен генә әйткәндә, кышка казып алып, язга кабат утыртасы булмаса, аның кызыгы да булмас иде», — дип көлә коллекционер. 350гә якын сортны көзен казып алу эше бер айга сузылырга мөмкин, иң мөһиме — яңгырлар гына комачауламасын, дип тә өсти. 

Үзе дәлияләрнең шар сыманнарын аеруча ярата. «Алар, суын гел алыштырып торсаң һәм кояшлы урыга куймасаң, вазада атна буе торалар. Күпләр әле дә дәлияләрне „әбиләр чәчәге“ ди, әмма бу күптән алай түгел инде, алар хәзер модада, чәчәк кибетләрендә дә аларны күрергә була», — ди Лилия. 

Георгинның татарчасы — дәлия. Ә сез бу атаманың каян килеп чыкканын белә идегезме? Ул швед ботанигы Андерс Даль хөрмәтенә шулай аталган. Европада бу чәчәкне далия дип йөртәләр. 

Русча атамасы георгин — Россиядә эшләгән немец ботанигы, географ һәм этнограф Иоганн Готлиба Георги хөрмәтенә.