«Бер мизгелдә гомере өзелә язган»: РКБ табиблары 27 яшьлек мотоциклчыны коткарып калган

Табиблар әйтүенчә, мондый җәрәхәт белән исән калу сирәк очрый.

Фаҗига 27 июньдә була. Егет сүзләренчә, ул рөхсәт ителгән тизлек белән хәрәкәт иткән. Әмма каршыга килеп чыккан җиңел автомобиль, юл йөрү кагыйдәләрен бозып, борылыш ясаган. Мотоциклчы бәрелештән соң өч юл полосасы аша очып төшкән.

Ашыгыч ярдәм бригадасы аны Республика клиник хастаханәсенә шок хәлендә китергән. Табиблар аның оча сөяге, боты, тезе, кулы һәм муен умырткасы сынуын ачыклаган. Әмма иң куркыныч җәрәхәт компьютер томографиясе вакытында билгеле булган — пациентның аортасы өзелгән.

Башта травматологлар ашыгыч операция ясап, сынган сөякләрне һәм җәрәхәтләрне эшкәрткән. Шул ук вакытта рентгенологлар аорта өлкәсендә зур гематома һәм өзелү билгеләрен күргән. Контраст белән кабат үткәрелгән компьютер томографиясе бу диагнозны тулысынча раслаган.

Табиблар аңлатуынча, егетнең гомере зур бәхет аркасында сакланып калган. Өзелгән урынны вакытлыча гематома каплап торган, шуңа күрә ул кан югалтудан һәлак булмаган. Әмма ул теләсә кайсы мизгелдә яңадан ачылып, үлемгә китерергә мөмкин булган.

Пациентны реанимациягә күчергән арада табиблар аорта өчен махсус стент-графт эзли башлаган. Әмма аның кан тамырлары төзелеше гадәти булмаганлыктан, кирәкле эндопротез Татарстанда табылмаган. Кирәкле стент-графтны Мәскәүдән махсус курьер китергән.

28 июнь иртәсендә табиблар уникаль операция башкарган. Башта хирургларга сул яктагы йокы артериясендә кан әйләнешен яңадан торгызырга туры килгән. Шуннан соң гына рентген-хирурглар өзелгән аортага стент-графт урнаштырган.

Дүрт сәгатьтән соң яшь ир-ат реанимациядә аңына килгән һәм мөстәкыйль сулый башлаган.

Хәле тотрыклангач, РКХның травматология бүлегендә аңа таз һәм тез сөякләрен беркетү буенча тагын бер операция ясаганнар.

Хәзер пациент өенә чыгарылган. Алдагы ике айда ул металл конструкцияләр белән йөриячәк. Сөякләр тулысынча ялгангач, аларны алу өчен тагын бер операция үткәреләчәк.

Табиблар билгеләп үткәнчә, мондый авыр җәрәхәтләрдән соң пациентның исән калуы — ашыгыч ярдәм хезмәтенең, диагностиканың һәм берничә профильдәге белгечләрнең бердәм эш нәтиҗәсе.