Минтимер Шәймиев: «Һәрдаим теләктәшлегегез өчен бик зур рәхмәт сезгә!»

Хөрмәтле милләттәшләр! 
«Шәһри Казан» газетасының мөхтәрәм авторлары, 
хезмәткәрләре һәм укучылары!
Хөрмәтле Радик Рәшит улы!

Сезне «Шәһри Казан» газетасының 35 еллык истәлекле юбилее белән чын күңелдән тәбрик итәм!
«Шәһри Казан» республикабыз һәм халкыбыз язмышының иң мөһим, иң катлаулы мизгелендә, хәлиткеч үзгәрешләр алдыннан, шәһәр газетасы буларак барлыкка килде. Дөресен генә әйткәндә, без мондый басмага мохтаҗ идек, чөнки ул чорда төп сәяси вакыйгалар нигездә башкалабыз Казанда барды. Бу вакыйгаларда татар халкының роле һәм омтылыш-ниятләре хакында дөрес һәм җәһәт мәгълүмат тарату максатында яңа милли басма оештыру милләтебезнең иҗтиһад юнәлешендә берләшүенә, шул ук вакытта, милләтара татулыкны саклап калуга ярәм итте. 

1990 елның августында, газетаның беренче санын чыгаруга хәер-фатиха биргәндә: «Заман һәркайсыбыздан фидакарьлек сорый, чорга лаек эшләр көтә» дигән идем. «Шәһри Казан»ны башлап нәшер итүчеләр һәм аларның дәвамчылары, чыннан да, фидакарьлеккә сәләтле булып чыкты. Газета татар халкын борчыган күп кенә мәсьәләләргә заманча, төпле һәм киң карашы, кыю фикерләре, милләт мәнфәгатьләрендәге гамәлләре белән күпсанлы укучыларның күңелен яулады, Татарстанның олпат газета-журналлары сафында үз урынын тапты, тора-бара, Казан шәһәре чикләреннән чыгып, республика күләмендәге җитди басмага әверелде. Газета бүген дә, милли рухиятебезне саклап, милләтебез яшәешенең нигезен хасил итә торган төп юнәлешләрдә уңышлы эшләп килә. 

Төрле елларда, төрле заманнарда үзләренең көч-талантын «Шәһри Казан»га багышлаган баш мөхәррирләргә, журналистларга, язучыларга, иҗади хезмәткәрләргә республикабыз үсешенә, милләтебезнең үзаңын ныгытуга, мәдәниятен, әдәбиятын, телен, матбугатын, гореф-гадәтләрен саклауга һәм үстерүгә керткән олы хезмәтләре өчен ихлас рәхмәтебезне җиткерәсем килә. 

Республика җитәкчелегендә күп еллар эшләү дәверендә «Шәһри Казан» белән һәрчак эшлекле һәм дустанә мөнәсәбәттә булдык. Бүгенге көндә дә, «Яңарыш» Республика Фондының игелекле эшләрендә фикердәшләр булып, янәшә атлыйбыз. Һәрдаим теләктәшлегегез өчен бик зур рәхмәт сезгә.

Сезгә алга таба да халыкка хезмәт итү юлында яңа иҗади казанышлар, уңышлар, көч-егәр һәм исәнлек-саулык телим!

МИНТИМЕР ШӘЙМИЕВ,
Татарстан Республикасының Беренче Президенты