Шамил Садыйков: «Ел саен Россия төбәгендәге бер газетаны югалтабыз»

Өч көн дәвамында журналистлар төбәкләрдә нәшер ителә торган татар матбутының киләчәге турында фикер алышачак, проблемаларны уртага салып сөйләшәчәк, үзлерендәге уңай тәҗрибәләр белән дә уртаклашачак. 

15 төбәк, 40тан артык журналист

Форумны Бөтендөнья татар конгрессы Милли Шура рәисенең беренче урынбасары - Бөтендөнья татар конгрессы Башкарма комитеты җитәкчесе Данис Шакиров ачып җибәрде. Ул чарада Россиянең 15 төбәгеннән 42 журналист катнашуын билгеләп үтте.

Быел делегатлар Башкортстан, Удмуртия, Марий Эл, Чувашия республиклары, Самара, Төмән, Ульяновск, Свердловск, Түбән Новгород, Омск, Оренбург, Киров, Пенза өлкәләре, Пермь крае, Мәскәү шәһәреннән килгәннәр. Катнашучылар арасында басма һәм электрон матбугат, радио һәм телевидение хезмәткәрләре, блогерлар бар. 

Татар журналистикасының киләчәге нинди? 

Татарстан Республикасы "Татмедиа" матбугат һәм массакүләм коммуникацияләр агентлыгы житәкчесе Айдар Сәлимгәрәев форумга килүчеләрнең татар журналистикасының киләчәген ничек күрүләре хакында ишетәсе килүен әйтте. 

- Күреп торабыз, авырлыклар бик күп. Шулар хакында сөйләшеп, фикерләшеп, яңа формалар, эш юнәлешләре табып, форумның файдалы узуына ышанам, - диде ул. 

Яңа форматлар кирәк

"Татмедиа" акционерлык җәмгыяте генераль директоры Шамил Садыйков та басма матбугатның зур кыенлыклар белән очрашуын билгеләп үтте. Быел Оренбургта газета чыгудан туктаган, аңа кадәр Әстерханда, Магнитогорскта проблемалар булган. 

- Ел саен төрле сәбәпләр аркасында бер газета юкка чыга. Кайсыдыр төбәктә журналистларыбыз китеп бару сәбәпле газета чыгудан туктый, кайбер төбәкләрдә почта белән проблемалар бар, кайдадыр типография бәяләре бик нык артты. Күреп торабыз: тиражлар да кими.

Шуңа күрә, чыннан да, яңа форматлар турында уйларга кирәк. Әйтик, Екатеринбургта, Санкт-Петербургта яхшы гына сайт форматында эшләп киләләр, бик актив блогерлар да бар. Газетасыз калган төбәкләрдә мәгълүмат таратуның яңа ысулларын эзләргә кирәк. Без, үз чиратыбызда, булышырга риза, - дип билгеләп үтте Шамил Садыйков. 

Төбәкләрдән килгән делегатлар үз төбәкләрендә нәшер ителә торган матбугат чаралары турында сөйләде, уңышлары белән уртаклашты, күңелләрен тырнаган мәсьәләләргә тукталды, тәкъдимнәрен кертте.