#Язмалар 03 апрель 2026, 10:41

Таңнан торып камыр баса: Апаста яшәүче Флера апаның серләре нидә?

03 апрель 2026, 10:41

Апаста яшәүче Флера апа Абдуллаҗанова таң белән торып камыр куя да, кеше йокыдан торганчы аның инде бәлеш, өчпочмак, кыстыбый, пироглары әзер дә була.

Скопировать ссылку

Таңнан торып камыр баса: Апаста яшәүче Флера апаның серләре нидә?

Көн саен шулай. Аның кулларына күз иярми. Барысын да тәмен белеп, күз ачып йомганчы эшли ул.

– Мин үзем Олы Болгаер авылы кызы. Әнием Нурлыбанәт бик тәмле куллы иде. Аңардан карап торып, янында кайнашып өйрәндем. Инде хәзер камыр ризыкларын пешерү көндәлек шөгылемә әйләнде. Тәмле дип мактап куялар да, күңелләр тагын да үсеп китә, – ди ул.
Флера апа – һөнәре буенча хисапчы. Районның мәгариф һәм мәдәният бүлекләрендә исәп-хисап эшләрен башкарып лаеклы ялга чыккан.

Өйдә генә тора башлагач, яраткан шөгыленә керешкән. 2012 елдан бирле ул камыр ризыклары пешерә.

– Пирогларны 8 төрле эчлек белән ясыйм. Бәлеш, гөбәдия, өчпочмак, өлеш, самса пешерәм. Камыр куймаган көннәрдә пилмән ясыйм, өй токмачы кисеп куям. Төнге сәгать икедә ятып, иртәнге сәгать дүрттә торган көннәр дә бар. Һәрчак вакытында өлгертергә тырышам, камырымның исә уңмый калган көне юк, – ди Флера апа.

Аш-су остасы әйтүенчә, ризык тәмле булсын өчен, бар мәшәкатьне читкә куеп, чын күңелдән эшләргә, вакытны төгәл билгеләргә һәм барын да үлчәп салырга кирәк.

– Камыр ризыклары кәеф юклыкны да, иренеп кенә тотынуны да сизә ул. Шуңа да: “Булсын дип эшләгез!“. Шул ук вакытта ризыкның нинди булуы кулдан, синең сәләтеңнән дә килә. Рецепт сораган кешегә беркайчан да сер саклап, нидер әйтмичә калдырганым юк. Бер үк рецепт белән дә төрле кешенең төрлечә чыга, – ди үзе.

Флера апаның йорты да ялт иткән. Күпме генә камыр ризыгы пешерсә дә, өстәлендә артык он бөртеге дә, өелгән савыт-саба да күрмәссең. Барысына да өлгерә һәм җаваплылык тоеп эшли ул.

Балалары, оныклары анарда еш кунак була.
- Әниебез һәркемгә ачык йөзле, бик тә ярдәмчел, олысын-кечесен хөрмәт итеп яши. Оныкларын да сыйлап кына тора. Кайткан саен капка төбеннән үк тәмле ризык исе каршы ала, - ди кызы Алинә.

Флера ападан камыр рецепты:
1 пачка маргаринны эретәм, аңа 1 йомырка сытам. Йомырканы болгаткач, 1 стакан җылымса сөт, 1 стакан су, ярты стакан сыек май салам. Аларның барысын әйбәтләп болгатам һәм кечкенә төргәкле коры чүпрәнең дүрттән бер өлешен кушам. Аннан чамалап он салам һәм камыр басам. Камыр кулга ябышмый башлагач, он салудан һәм камырны басудан туктыйм. 15 минуттан пирогларны ясый башлыйм. Әлеге камыр белән өчпочмак та, бәлеш тә пешереп була.

Ләйлә Шиһабиева

Кызыклы яңалыкларны күзәтеп бару өчен безнең МАХ каналына кушылыгыз.