Таныш булмаган гөмбәне җыйсаң, штраф та түләргә мөмкинсең

Таныш булмаган гөмбәне җыеп агуланып кына калмыйсың, әле штраф та түләргә мөмкинсең икән. 12 октябрьдән Кызыл китапка кертелгән үсемлекләрне һәм гөмбәләрне законсыз җыю, саклау, сату өчен җинаять җаваплылыгы кертелде. 

Хокук бозучыларга 480 сәгатькә кадәр мәҗбүри эшләр рәвешендә җәза яки ике елга кадәр төзәтү эшләре, йә 1 миллион сумга кадәр штраф белән дүрт елга кадәр иректән мәхрүм итү яный. Законсыз сатып алу яки сату өчен 500 меңнән 1,5 миллион сумга чаклы штраф белән биш елга кадәр мәҗбүри эшләр каралган.

Татарстан Республикасының Биологик ресурслар буенча дәүләт комитеты матбугат үзәге мәгълүматларына караганда, бүген үсемлек һәм хайваннарның күп төрләре юкка чыгу алдында. Шул нисбәттән сирәк очрый һәм юкка чыгу куркынычы яный торган 226 төрдәге хайван, 318 үсемлек һәм 87 гөмбә Татарстанның Кызыл китабына кертелгән. Алар артыннан ел әйләнәсе мониторинг алып барыла. 

КФУның табигатьне тергезү һәм су ресурсларын файдалану кафедрасы өлкән укытучысы Наил Назаров әйтүенчә, Җинаять Кодексының әлеге яңа маддәсе, гөмбәчеләрдән битәр, аучылар белән балыкчылар өчен аеруча мөһим. 
– Соңгы вакытта экология проблемасына игътибар артты анысы, әмма әлегә тиешенчә түгел. Шуның өчен таләпләр дә табигатебезгә зыян китерү очракларын булдырмау максатыннан кырысландырыла. Шул ук вакытта гөмбәчеләргә алай борчылырга да кирәкми. Кызыл китапка кертелгән гөмбәләрнең күбесе ашарга яраксызлар. Әмма Кызыл китап белән алдан танышып чыгу комачауламый. Бу китап биш ел саен яңартылып тора, кайбер төрләр аннан төшеп калдырыла, кайберләре киресенчә өстәлергә мөмкин. Шунысы да бар: бездә Кызыл китапка кертелмәгән гөмбә икенче бер төбәктә сирәк очрарга һәм аның өчен штраф та түләтүләре бар. Һәр гөмбәче артыннан тикшерүче куеп булмый, аларны кем контрольдә тота, дигән фикер дә булырга мөмкин. Монда инде һәр кешенең экологик үзаңыннан, табигатькә мөнәсәбәтеннән тора, – дип кисәтте эколог.

Биология фәннәре кандидаты, миколог Галина Юпина әйтүенчә, монда фәкать бер генә кагыйдәне исә тотарга – үзеңә таныш булмаган гөмбәне җыймаска кирәк.
– Тик шулай да Кызыл китап белән танышу комачауламый. Бер-беренә охшаган гөмбәләр дә була бит. Кызыл китапка кергән гөмбәне хәтерләтсә, алмавың хәерле, – ди ул.