Әниләр һәм депутатлар лагерьларны тикшерә

Чөнки ишетеп-карап торабыз: фаҗигале хәлләр балаларны да аяп тормый. Ул-кызларын лагерьларга озаткан яки җибәрергә җыенган әти-әниләрне күпмедер тынычландырыр өчен, «Бердәм Россия» партиясенең Татарстан бүлекчәсе балаларның җәйге ялы турында канун белән чыгарга җыена. Кирәкле һәм бик вакытлы әлеге канунны тәкъдим итәр алдыннан, партия депутатлары шәһәр яны лагерьларының хәле белән танышырга булганнар. Шундый рейдларның берсенә - «Заречье» балалар ял үзәгенә - журналистлар һәм әти-әниләрне дә чакырдылар. Йөз тапкыр ишеткәнче, бер күрүең мең артык.

- «Бердәм Россия» пар­тиясенең «Әнием ки­ңәш­ләре» дип аталучы республика проекты бер ел элек старт алган иде. Партия әгъзалары һәм әти-­әниләр балалары ял итә торган лагерьларга барып, андагы яшәү шартлары, куркынычсызлык кагыйдәләренең үтәлеше белән танышалар. Быел Татарстан малайлары һәм кызлары нәтиҗәле ял итсен өчен, 1300дән артык ял базасы эшләрен башлап җибәрде. Шуларның 199ы - шәһәр янындагы стационар, 109ы - чатыр­лы, 969ы - мәктәп каршындагы, бишесе - Кара диңгез буендагы лагерьлар. Шулай ук 120 хезмәт һәм ял лагере, 18 шифаханә дә балаларга яңа уку елына көч туп­ларга ярдәм итә, - диде «Бердәм Россия» партиясенең Татарстан бүлекчәсе башкарма комитеты җитәкчесе Андрей Кондратьев.

Казан шәһәре балаларының ялын оештыру «Ял» шәһәр үзәге директоры Илсур Хисмәтуллин лагерьның матур итеп төзекләндерелгән корпусларын, 400 балага исәпләнелгән ашханәсен горурланып күрсәтеп йөрде. Әйе, бүгенге «Заречье» кайчандыр безнең малайлар ял иткән лагерь түгел икән инде. Аерма җир белән күк арасы. Мин моны ишек төбеннән үк тойдым. Элек теләсә кем кереп-чыгып йөри алган лагерь биек таш койма белән уратып алынган. Ял итүчеләрнең тормышына бернинди дә куркыныч янамаска тиеш. Ә бит балалар ялы тарихына «Заречье» бер кызның суда батып үлүе белән кереп калган иде. Бик яхшы хәтерлим мин ул фаҗига булган көнне. Улыбыз да шунда ял итә иде. Аны күрергә дип килсәк, лагерьны кайгы сөреме баскан. Бер бала баткан, диләр, кем икәнен төгәл генә әйтүче юк.

Җитмәсә, улыбызны да шактый озак эзләп кенә таптылар. Аның исән-сау йөгереп килгәнен күргәнче, нинди хисләр кичергәнебезне үзебез генә беләбез.
Мондый фаҗигаләр, зур югалтулардан саклар өчен, лагерьда хәзер барысы да эшләнә икән. Вахтада ике сакчы тәүлек буе лагерьның тынычлыгын саклый. Ишек төбенә металлэзләгеч куелган. Әти-­әниләрне лагерь территориясенә бөтенләй кертмиләр, бары тик шунда вахта янында гына очрашып-сөйләшеп торырга рөхсәт. Шулай ук балаларны да лагерь территориясеннән чыгармыйлар: су керү, урманга сәяхәткә бару катгый тыела. Ашханәдә көнгә биш тапкыр тукланалар, махсус китерелгән су гына эчәләр. Без кергәндә, тәмле рассольник һәм пешкән бавыр исе чык­кан иде.

Меню килокалорияләрне санап, бик җентекләп төзелә, диделәр. Бер табиб һәм шәфкать туташы эшли. Корпусның без кергән бүлмәсе ун балага исәпләнелгән, сигез карават куелган, кайберләре ике катлы иде. Иң сөендергәне - һәр бүлмәдә барлык уңайлыклар да бар, хәтта душ кабинасы да. Билгеле инде, мондый шартлар безнең белән ияреп килгән әниләр Айгөл Ширяева һәм Лилия Хөснетдиновага да ошамый кала алмады. Алар үзләренең улларын тизрәк үстереп, нәкъ менә бирегә җибәрәчәкләрен әйттеләр. Шушы уңайлыклар, бу җәннәтнең ике атналык бер сменасы әти-әниләргә 3-4 мең сумга төшә икән. Чөнки «Заречье» - дәүләт карамагындагы лагерь, аның юлламалары күпбалалы, ятим балалар тәрбияләүче һәм авыр хәлдә калган гаиләләргә бирелә.

Андрей Кондратьев без журналистларны, барлык муниципаль лагерьларда да шундый шартлар тудырачакбыз, дип ышандырды. Ә менә күп рекламалана торган коммерция лагерьлары өчен борчылуларын әйтте. балаларның җәйге ялын оештыру турындагы «Бердәм Россия» партиясенең Татарстан бүлекчәсе тәкъдим итәчәк әлеге канун гамәлгә керсә, киләсе җәйдән лагерьга балаларын озаткан әти-әниләрнең борчылулары шактый кимер.