“Сул кул белән ашау турында Исламда нәрсә диелә?”: сорауларга - җаваплар

“Әссәламегаләйкем, хәзрәт. Үзем намазда, әлхәмделилләһ. Хатынны ничек үгетләргә?”
– Аның берничә юлы бар: сабырлык, хикмәт, матур вәгазь, яхшы үрнәк. Иң мөһиме ачуланма, үпкәләмә, кычкырма, яратып, хөрмәт итеп башкарсаң, хатының күңеле белән кабул итәчәк.

“Төшләр чынга ашып бара. Төшләргә ышану дөресме?
– Дөрес, тик кайберләре шайтаннан булырга мөмкин. Сак булыгыз.

“Нигә догалар кабул булмый, нәрсә өстендә эшләргә кирәк?”
– Яки сез сораган әйбер сезнең өчен хәерле түгел, йә ихласлыгыгыз җитми. Йә булмаса гөнаһлардан тәүбә итмәгәнсез. Догалар кабул була торган вакытларда сорап карагыз. 

“Җәй айларында баланы сөннәткә утырту начар түгелме?”
– Дин буенча бер гөнаһы да юк. Медицина буенча әйтә алмыйм. 

“Диндә кургаш коеп өшкерү бармы? 
– Юк. Диндә фәкать Коръән белән генә ярый.

“Улыбыз туарга тора. Аңа Даян исеме кушсак ярыймы икән?”
– Даян, дип Пәйгамбәребез бер хәдисендә Аллаһны атый. Хәерле, шул ук вакытта җаваплы һәм көчле исем. Баланы бу исемгә туры килерлек итеп тәрбияләргә кирәк. 

“Кемгә хәер бирү хәерлерәк?”
– Үзе бик мохтаҗ булып та, хәер сорарга оялган кешегә.

“Укылмый калган намазың булса, икенче көнгә аның фарызын гына укырга ярыймы?”
– Намазны вакытында уку фарыз. Укымый калдыру – зур гөнаһ. Әгәр дә сездән тормаган сәбәпләр белән калса, фарызын гына каза кыласыз.

“Шайтан белсен” дип әйтү дөресме?” 
– Дөрес түгел. Мөселманнар “Аллаһ белүче” диләр.

“Шампан шәрабын алып бирергә куштылар. Аны сатып алып, сораган кешегә тапшыру гөнаһ түгелме?”
– Аның гөнаһы эчкән кебек үк булачак. Бу Пәйгамбәребез (с.г.с.) хәдисләрендә язылган.

“Машинада барганда намаз укырга ярыймы?”
– Әгәр дә туктап укырга мөмкинлек булса, машинада уку дөрес булмас.

“Ни өчен һаман бер үк хаталар эшләнә, вакыйгалар кабатлана?”
– Дөрес нәтиҗә ясамыйсыз. Хаталарның килеп чыгу сәбәпләрен үзегездән эзләгез.

“Тәмәке тарту хәраммы? Хөкеме хәмернеке кебекме?”
– “Әл-Әгъраф” сүрәсенең 157нче аятен карасак, анда Аллаһ кешегә зыян салган һәр нәрсәне хәрам ди.

“Дога тәкъдирне үзгәртә аламы?”
– Әйе, үзгәртә.

“10 яшьлек баланы яулык ябарга мәҗбүриләү дөресме?”
– Мәҗбүриләргә ярамый. 12-14 яшьтә. Йомшак белән генә аңлатырга кирәк.

“Доганы намаз укымаган кешегә дә укырга ярыймы?”
– Аллаһның капкасы барлык кешеләр өчен дә ачык. Намазлы булсаң, догалар тизрәк кабул булыр һәм хәерлесе генә тормышка ашар.

“Истихара намазыннан соң җавап күпме вакытта килә?”
– Истихара намазын уку мөһим, ә җавабын көтү түгел. Җавабы килмәсә дә, җаның теләгәнчә эшлә. Шул дөрес булыр.

“Нумерологларга мөрәҗәгать итәргә ярыймы?”
– Исламда нумерология дә, астрология дә, йолдызнамәләр дә тыелган. 

“Диндә баланы кырык көн кешегә күрсәтергә ярамый дигән әйбер бармы?”
– Юк.

“Сул кул белән ашау турында Исламда нәрсә диелә?”
– Пәйгамбәребез (с.г.с.): “Сул кул белән ашамагыз. Дөреслектә, сул кул белән шайтан ашыйдыр”, – ди.

“Балага узмас өчен саклану рөхсәт ителәме?”
– Әйе. Ислам динендә гаиләне планлаштыру рөхсәт ителә.

“Намазны ташласаң, гөнаһы зурмы?”
– Ялкаулык белән булса, зур гөнаһ. Әгәр дә намаз укырга кирәкми, бер файдасы да юк дигән фикер белән калдырсагыз, диннән дә чыгарга мөмкинсез.