Пенсионерларга Яңа ел алдыннан яңа түләүләр кертергә телиләр

"Гадел Россия" партиясе хөкүмәткә ил пенсионерларына ел саен 13нче пенсия түләү турындагы закон проектын юллаган. Партия лидеры Сергей Миронов фикеренчә, әлеге инициатива илдәге хәерчелеккә каршы юнәлтелгән. Ул пенсионерларга Яңа ел бәйрәме алдыннан кредитлардан баш тартып, бурычка кермәскә булышачак. "Пенсионерлар социаль яктан якланмаган гражданнар һәм дәүләт аларга өстәмә түләүләр белән ярдәм итәргә тиеш", - ди Миронов.
Әмма Дәүләт Думасының социаль сәясәт комитетында һәм Пенсионерлар союзында  өстәмә түләүләр өчен бюджетта акча табылмаячак дигән фикердә торалар. 
Партия исәпләп чыгаруынча, идеяне тормышка ашыру өчен 654,8 миллиард сум акча кирәк булачак. Әлбәттә, әлеге идеяне ил президенты Владимир Путин да хупларга мөмкин.