175нче гимназия укучылары кайда укыячак?

17 майдан Казандагы 175нче гимназиянең IX-XI сыйныф укучылары күршедәге 174нче мәктәптә белем алуын дәвам итәчәк, калган балаларны уку елы ахырына кадәр дистанцион укуга күчерәчәкләр. Казан мэры Илсур Метшин шулай дип белдерде, дип яза "Татар-информ".

175нче гимназия директоры Әминә Вәлиева, 174нче мәктәп директоры Аида Ибраһимова һәм кораллы һөҗүмнән зыян күргән гимназия укучыларының әти-әниләре вәкиле белән очрашуда шундый карар кабул ителде. Фикер алышуда Гадәттән тыш хәлләр министрлыгы системасы психологлары да катнашты.

«Татар-информ» агентлыгы 175нче гимназиянең чыгарылыш сыйныф укучылары өчен Төп һәм Бердәм дәүләт имтиханнарын тапшыру графигы үзгәрмәячәге хакында элегрәк хәбәр иткән иде.