Шәһри Казан

“Йосыф” драмасы Кол Гали әсәренә охшаганмы?

Идел буе Болгарында Ислам динен кабул итүнең 1100 еллыгына багышлангын чаралар Татарстанда күп уза. Г.Кариев исемендәге яшь тамашачы театры Кол Галинең “Кыйссаи Йосыф” әсәре буенча спектакль тәкъдим итә.  Болгар чоры шагыйренең иҗатына татар театрлары беренче тапкыр гына мөрәҗәгать итми. Кариев сәхнәсендә бу сезонда соңгы премьера тамашачыны электрон музыка һәм заманча хореография белән шаккаттырачак.

Кол Галинең “Кыйссаи Йосыф” әсәре хәзерге көннәргә кадәр килеп җиткән борыңгы әдәбият үрнәкләренең берсе. Элек ул һәр татар гаиләсендә Коръән китабы кебек кадерле булган. Киләсе елга әсәр язылуына 790 ел була. Бүген дә музейларда “Кыйссаи Йосыф” белән танышып була. Мәсәлән, Татар китабы йортында әлеге әсәр көйләп укыла.

- “Йосыф” спектакленең нигезе - Кол Гали әсәре һәм Коръән сүрәләре. Тамашада поэма сюжетыннан бигрәк фәлсәфи эчтәлек өстенлек итә. Диолог, монологлар бик аз кулланыла. Без мәгънәне пластика һәм музыка аша җиткерәбез, алар аерым образ. Спектакльдә ут һәм декорацияләр дә игътибарга лаек. “Йосыф” драмасында ислам мотивлары кызыл җеп булып үрелеп бара. “Йосыф-Зөләйха” спектаклендә мәхәббәт тарихына зур игътибар бирелгән иде, әлеге драманы әдәби әсәр белән таныш булмаган тамашачы да аңлый алачак. Сәхнәдә Йосыф пәйгамбәрнең  тормыш юлы күрсәтеләчәк, - диде Г.Кариев исемендәге театрның баш режиссеры Ренат Әюпов. 

“Йосыф” драмасы һәр кеше күңелендә изгелеккә һәм яктылыкка урын булганын искәртә. Күпме генә вакыт үтсә дә, хәзерге заман шартларында да Йосыф үрнәк герой булып кала.
- Йосыф ролен алгач, җаваплылык сиздем. Мин дингә якын кеше түгел, әмма драмада уйнап, күңелем яхшы якка үзгәрешләр кичерә. “Йосыф-Зөләйха” спектакленнән өзекләрне махсус карамадым,  яңа образ тудырасы килде. Премьерага күп калмады, дулкынланам, режиссер куйган биремне үти алырмын, дип ышанам – диде “Йосыф” драмасында төп рольне башкаручы Илсаф Нәҗипов.

Реклама

“Йосыф” спектакленең премьерасы 15-16 июньдә Г.Кариев театры сәхнәсендә узачак. Билетларны “Пушкин картасы” ярдәмендә алырга мөмкин.

Илгизә Галиуллина

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: