Соңгы ике атна эчендә Роспотребнадзор белгечләре 30 хезмәт коллективын тикшерде, шуларның 18ендә хокук бозулар ачыкланган. Бүген бу хакта Татарстан Республикасы Хөкүмәте Йортында узган республика киңәшмәсендә Татарстан Республикасы буенча Роспотребнадзор идарәсе җитәкчесе Марина Патяшина хәбәр итте.
Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә Татарстан Премьер-министры Алексей Песошин да катнашты.
Марина Патяшина ноябрь башыннан яңа коронавирус инфекциясе белән авыручылар санының артуы күзәтелә, дип билгеләп үтте. Октябрь белән чагыштырганда авырулар саны 43% ка арткан. Соңгы тәүлек эчендә 85 яңа очрак теркәлгән. Балалар саны аз, шул ук вакытта 65+ яшьтә авыручы затлар өлеше октябрь белән чагыштырганда 2 тапкырга арткан.
Берничә ил белән авиаэлемтә яңартылганнан соң Казанга 589 рейс һәм 125 меңгә якын пассажир кайткан. Ноябрьдә авиарейслар саны кимегән, читтән кертелгән очраклар саны да 3 тапкырга кимегән.
2 атна эчендә 1445 объект тикшерелгән, тәртип бозучылар өлеше 8%тан 10,5%ка кадәр арткан. Барысына карата да административ эшләр кузгатылган.
ТР Президенты кушуы буенча республиканың барлык югары уку йортлары тикшерелгән. 30 югары уку йортында 106 уку корпусы, тулай торак, спорт объектлары тикшерелгән. 14 очракта бозулар ачыкланган. Урта һөнәри белем бирү учреждениеләрен тикшерү башланган.
Рөстәм Миңнеханов билгеләп үткәнчә, ковид һәм сезонлы авырулар белән авыручылар саны артуга бәйле рәвештә, гражданнар медицина учреждениеләренә шалтырата алмый аптырыйлар икән. Ул искәрткәнчә, чәршәмбе көннән республикада махсус колл-үзәк (8-800-222-59-00 яки 122) Covid-19 буенча консультация алу өчен эшли. ТР Сәламәтлек саклау министрлыгы башлыгы барлык сырхауханәләр һәм дәвалау учреждениеләре бердәм телефон системасына берләштереләчәк, ул килеп туган мәсьәләләрне күзәтеп торырга һәм хәл итәргә мөмкинлек бирәчәк, дип аңлатты. «Бу система якын арада безнең медучреждениеләр буенча тулы картинаны күрсәтергә тиеш. Бу бик мөһим. Без тиз арада аңа карата үз мөнәсәбәтебезне белдерергә тиеш", - дип ассызыклады Татарстан Президенты.
Шулай ук Рөстәм Миңнеханов билгеләп үткәнчә, 1-10 декабрьдә республикада Инвалидлар декадасы узачак. «Мөмкинлекләре чикләнгән кешеләрнең ихтыяҗларына, инвалид балалар тәрбияләүче гаиләләргә игътибар итәргә кирәк. Хакимиятнең бурычы – алар өчен башка гражданнар белән тигез мөмкинлекләр булдыру. Инвалидларга, бигрәк тә пандемия шартларында үз вакытында һәм сыйфатлы медицина ярдәмен тәэмин итәргә, үсеш үзенчәлекләре булган кешеләрнең көндәлек тормышы җайлы һәм уңайлы булсын өчен кулдан килгәннең барысын да эшләргә кирәк. Ункөнлек кысаларында Роспотребнадзор таләпләре нигезендә барлык чаралар да, санитар хәлне исәпкә алып, оештырылырга тиеш", - дип өстәде ТР Президенты.
ТР Президенты Матбугат хезмәте
Иң мөһим һәм кызыклы язмаларны Татмедиа Telegram-каналында укыгыз
