Рәхмәт сезгә, укытучылар! Бу сүзләрне сез исән чагыгызда ишетергә тиеш!

Ун ел тормышын бала мәктәптә уздыра. Ун ел дәвамында баланың укытучылары белән туганлашып ук диярлек бетүе табигый. Күп очракта балага алдагы тормышына юнәлеш бирүче дә – укытучы. Әти-әниеңә дә сөйли алмый торган серләрең белән уртаклаша алучы да – укытучы. Авыр чакларда синең яклаучыга әверелүче дә – укытучы. Хәтта үлемнән дә саклап калырга мөмкин булган кешеләрнең берсе ул - укытучы...

Казан гимназиясендә килеп чыккан фаҗиганең геройлары да – укытучылар. Эльвира Игнатьева белән Венера Айзатова – бандит-җинаятьче мылтыгыннан бакыйлыкка күчкән укытучылар. Гомере буе балалар укыткан, җинаятьчене күпмедер вакыт тоткарлый алган, ахыр чиктә күп санлы яралары белән авыр хәлдә больницага китерелгән Мулланур Мостафин да, нинди экстремаль ситуациядә югалып калмаган мәктәп директоры Әминә Вәлиева да, балаларны ашыгыч рәвештә алып чыга алган, кабинет ишекләрен ашыгыч вакыта бикләп өлгергән башка мөгаллимнәр дә – каһарманнар.

...Укытучы һөнәренең дәрәҗәсе төшкән чор. Күпме кәгазь тутырып алҗыган, кәгазь эшен кулдан язып та, шуны ук компьютерга да кертүдән арыган, ата-аналардан күпме нахак сүзләр ишеткән, балалар, әти-әниләр тарафыннан ялгыш кына бер гамәлен дә соцчелтәрләргә чыгарудан куркып яшәгән вакытта алар барыбер нарасыйлары – укучылары белән янәшә. Куркыныч килгәндә дә...

Рәхмәт сезгә, укытучылар. Хөрмәтем чиксез... Бу сүзләрне сез вакытында, алай гына да түгел, һәр көн ишетергә лаеклы кешеләр...