Шар өстендәге кыз яки якташыбыз Камилә Вәлиевага Алинә Заһитова уңышын юрыйлар

13-14 сенябрьдә исә ул Чиләбедә узачак Россия этабында ярышачак. Камилә Чиләбедәге күнегүләре вакытында дүрт әйләнеш белән ике сикерү дә башкарган. Шулай ук дүрт сикерешле каскадлар белән ирекле программада да аерылып торган.

Камилә, Алинә Заһитова кебек, Этери Тутберидзе группасында шөгыльләнә. Кайбер белгечләр аны 2022 елда узачак Олимпиадада алтын медальгә дәгъва кылучы спортчыларның берсе дип атый.

Камиләгә 13 яшь, тумышы белән ул Казаннан. Тимераякка 3,5 яшь вакытында ук баскан. 2012 елда Мәскәүгә күчеп киткән, хәзер ул анда шөгыльләнә. Камилә дүрт әйләнеш белән сикерүе һәм катлаулы күнегүләрне башкаруы белән генә түгел, үзенең хореографиясе, музыкальлеге, артистизмлыгы һәм сыгылмалылыгы белән дә алдыра. Кыз биергә һәм нәфис гимнастика карарга ярата. Ә фигуралы шууда үзенең кумиры дип Алинә Заһитованы атый.

Аның иң отышлы программасы Пабло Пикассо рәсемендәге шар өстендәге легендар кыз образы. Аның рольгә чынлап торып керүе хәтта рәссамның оныгын да битараф калдырмаган. Нәкъ менә шул программасы белән ул үзен танытты да. Быел да ул шул ук кыска программасы белән чыгыш ясый, тренерлар аны бу елга да калдырыга булган. Атаклы тренер Вазген Азроян “Шар өстендәге кыз” программасын хәзерге фигуралы шуда иң яхшы программа дип бәяли.