Янгыннар чыга тора, үлүчеләр арта тора...

Бөгелмә янындагы Забугоровка авылында шәхси мунча янган, янгында өлкән яшьтәге хуҗабикә үлгән. Бу хакта ТР буенча Россия Гадәттән тыш хәлләр министрлыгының Баш идарәсе матбугат хезмәтендә хәбәр иттеләр.

Кичә кич соң гына Гадәттән тыш хәлләр министрлыгына Забугоровка авылында Елга аръягы урамында мунча януын хәбәр итәләр.

Ун минуттан соң урынга янгын сүндерүчеләр килгән. Янгын сүндерүчеләр төтен белән тулган бинага ачык ишек аша үтеп кергән. 88 яшьлек хатынның мәетен мунча ишегалдыннан тапканнар.

Тагын ун минуттан соң янгын сүндерелгән. Яну мәйданы алты квадрат метр тәшкил иткән.

Яңа Чишмәдә агач йортта чыккан янгында исә 64 яшьлек ир-ат һәлак булган. 18.20 сәгатьтә янгын турында хәбәр кичә бердәм ашыгыч хезмәтләрне чакыру 112 номерына килгән. Шалтыратучы Яңа Чишмә авылының Попов урамында шәхси йорт януын аңлаткан.

15 минуттан соң янгын сүндерелгән. Янгын сүндерүчеләр 64 яшьлек ир-ат мәетенә тап булган.

"Татар-информ" материаллары буенча