Аска түгел, өскә карап йөрер чак

Өй түбәсенә, түбә кыегына... Җир-Ана өчен кар мулдан булды быел. Вакыты-вакыты белән корылыктан иза чиккән туфрак өчен файдалы булыр ул, дип фаразлана. Җәйнең, әлбәттә, ничек киләсен белмибез, шулай да күпләр быел уңышка өмет баглый.

Ләкин медальнең ике ягы булган кебек, карның муллыгы зыян салган очраклар да булгалап тора. Өй башларында, биек биналарның түбәсендә кар шулкадәр күп ки, соңгы вакытта бәхетсезлек була күрмәсен дип йөри башладык. Көннәр җылыткач бигрәк тә сизелә борчылуларыбызның юкка түгел икәнлеге. Казанда әле теге йорт түбәсе ишелүе, әле бу бинаны карлы түбә басуы турындагы хәбәрләр артканнан арта барды.

Хәер, районнардан да килә андый хәбәрләр. Торак йортлардан гына түгел, ягулык станцияләренең түбәләре дә ишелеп төшә. Авылларда да халык теплицаларының җимерелүе, мунча, гараж, өч түбәләренең зарарлануы турында язгалый. Шөкер, әлегә адәм балалары зыян күрмәде бугай. Машиналар гына чәлпәрәмә килгәли. Хәлнең катлаулы икәнлеген, табигать белән шаярырга ярамаганлыгын Татарстан Рәисе дә аңлап, барлык җаваплы кешеләргә түбәләрне чистартырга боерды. Кызганыч, колак салмаучылар да бар, бугай.

Һәрхәлдә, безгә теге яки бу идарәче компанияләренең битарафлылыгы, өй кыекларында боз асылынып торуы, ишегалларының чистартылмавы турында язып торалар. Үзем яшәгән йортның түбәсен ике тапкыр чистарттылар быел. Йортта яшәүчеләрнең кесәсенә әйбәт сукты сугуын, шулай да иминлек беренче чиратта. Зарланучылар юк диярлек. Ләкин кыш әле бетмәде. Җылытып җибәргәч, кыекка җыелган кар тагын төшә башлады (кайдан киләдер ул кадәр кар дип аптырарлык та түгел бит быел). Сакланыйк, җәмәгать! Аска түгел, өскә карап йөрер чак...

Сабир Закиров
Фото: tatar-inform.ru

Билгеле булганча, «Яшәү өчен инфраструктура» илкүләм проекты гамәлгә ашырыла.