Казанда «Ярдәм» инклюзив үзәге ачылды: инвалидлар өчен нинди мөмкинлекләр бар?

Казанның Серов урамында 17 сентябрьдә «Ярдәм» инклюзив үзәге ачылды. Тантанада Татарстан Рәисе Рөстәм Миңнеханов, Казан мэры Илсур Метшин, депутатлар, дин әһелләре, җәмәгатьчелек катнашты.

Инвесторларга савап язылсын!

— Үзәк — зур мөмкинлек, ул ихтияҗы булган кешеләр өчен бик кирәкле. Тырышлык куйган һәр кешегә рәхмәт! Шәһәр җитәкчелеге башлангыч белән чыкмаса һәм теләктәшлек күрсәтмәсә, бу үзәк барлыкка килмәс тә иде. Илсур Рәисович активлык күрсәтте, Татарстанның һәм чит илләрнең инвесторларын җәлеп итте, — диде Рөстәм Миңнеханов.

Татарстан Рәисе үзенең котлау сүзендә Казан мэры Илсур Метшин белән беррәттән «Ярдәм-помощ» хәйрия фондын һәм аның җитәкчесе Илдар Баязитовны да мактады.

Җавап сүзе

— Бу объект төрле категориядәге инвалидларга күп файда китерәчәк. Уйлавымча, бу безнең фондның гына түгел, ә социаль хезмәт күрсәтү эшчәнлегенең яңа биеклеге, — диде «Ярдәм» мәчете имам-хатыйбы Илдар Баязитов.

«Ярдәм» инклюзив үзәге директоры Мәликә Гыйльметдинова да рәхмәт хисләрендә үзәк белән таныштырды. Өч катлы комплекска медицина, тернәкләндерү кабинетлары, спорт заллары һәм зур бассейн урнашкан. Инфраструктура физик мөмкинлекләре чикле кешеләргә җайлаштырылган. Биредә көненә 230 кеше шөгыльләнә ала. Җиһазларның барысы да Россиядә ясалган. Мәликә Гыйльметдинова әйткәнчә, үзәктә махсус хәрби операциядә катнашучыларның гаиләләренә дә хезмәт күрсәтеләчәк.

 «Иң мөһиме — үзәк кадрлар белән тәэмин ителде, эшнең уңышы һәм нәтиҗәсе кадрлардан тора», — диде Татарстанның хезмәт, эш белән тәэмин итү һәм социаль яклау министры Эльмира Зарипова.

«Ярдәм» инклюзив үзәге «Игелекле Казан» шәһәр программасы кысаларында, Казан мэры Илсур Метшин башлангычында барлыкка китерелгән. Төзелешкә 2024 елда керешелгән һәм тулысынча иганәчеләр булышлыгында гамәлгә ашырылган. Үзәкне ачу тантанасына килгән физик мөмкинлекләре чикле кешеләр һәм аларның гаиләләре өчен чәй табыны да әзерләнгән иде. Бина ишегалдында «Ай бакчасы» дигән фонтан төзелгән. Ярымай рәвешендәге арт-объектның авторы рәссам Әлфиз Сабиров.