#Җәмгыять 25 июль 2025, 14:05

Казанның аш-су осталары Карфагенны яулады

25 июль 2025, 14:05

Ислам хезмәттәшлеге илләренең Татарстанга хөрмәте зур.

Скопировать ссылку

Казанның аш-су осталары Карфагенны яулады

Ислам хезмәттәшлеге илләренең Татарстанга хөрмәте зур.

Казанда 2006 елдан башлап, аш-су остасы Юныс Әхмәтҗанов исемендә халыкара конкурс үткәрелә.

– Татарстан Рәисе Рөстәм Миңнеханов әлеге чараны оештыруга һәрвакыт теләктәшлек күрсәтә. Үзебез дә чит илләрдәге конкурсларда катнашабыз. Төркиядә узган ел Гран-при яулап кайткан идек, – диде республиканың Рестораторлар һәм отельерлар ассоциациясе президенты Зөфәр Гаязов “Татар-информ” мәгълүмат агентлыгында булган матбугат конференциясендә.

Ислам хезмәттәшлеге илләренең Казанда узган форумы вакытында Юныс Әхмәтҗанов исемендәге халыкара бәйгедә 18 илдән 150 аш-су остасы ярышкан иде.

– Татарстанны, Казанны шулкадәр ошатып киткәннәр. Тунистагы халыкара аш-су күргәзмәсе кысаларындагы кулинарлар конкурсына махсус чакыру алдык. Тунис дәүләтенә рәхмәт! Юл һәм яшәү чыгымнарын үзләре түләделәр. Бәйгедә 14 ил вәкилләре катнашты, – диде Рестораторлар һәм отельерлар ассоциациясе идарәсе рәисе Михаил Шәрипов.

Казаннан шеф-повар Рөстәм Рәхимов көмеш медаль яулаган һәм “Карфаген кубогы”на лаек булган. Тунистан Майсс Куни – алтын, ә Малайзиядән Илһам Ариэс Арман бронза медаль алган.

– Минем өстәлгә алдан ук куелган тартмада балык һәм яшелчәләр иде. Бурыч: тиз арада берәр төрле ризык әзерләргә кирәк. Бөтен хыялларымны салып тырыштым, жюри югары бәяләде. 14 илнең осталары арасында икенче урынга чыгу начар түгел инде, – диде Рөстәм Рәхимов.

Туниста студентлар арасында үткәрелгән аш-су осталыгы бәйгесендә төп бүләк итеп Казанда узачак Юныс Әхмәтҗанов исемендәге халыкара конкурста катнашу хокукы куелган. Михаил Шәрипов әйтүенчә, җиңгән команда Казанга юллама отуына чиксез шатланган.