Күршеләрне дуслаштыруның җае бар

Әлеге проблеманың  актуальлеген республика Рәисе Рөстәм Миннеханов күтәреп, Татарстанда күршеләрне очраштыру чаралары оештырырга кирәген белдергән иде. Бу программа бик күпләрдә кызыксыну уятты. 

“Күрше Фест” фестивале юктан башланган проект түгел. Ул нәкъ менә ишегалды халкын аралаштыру, дуслаштыру, табыштыру проекты. Шул уңайдан республика күләмендә иң үзенчәлекле проект авторларына конкурс игълан ителде. “Күрше Фест” фестивале  “Безнең ишегалды” программасының нәтиҗәле эшчәнлеген күрсәтүче мәйданчык та. Чөнки “Безнең ишегалды” программасы кысаларында тәртипкә китерелгән ишегалларында “Күрше Фест” чаралары уза. Күптән түгел конкурска нәтиҗә ясалды һәм җиңүчеләр билгеле булды. Җиңүчеләрнең берсе – Балтач районында яшәүче Гадил Гарифуллин белән элемтәгә кереп, аның проектының нидән гыйбәрәт булуы белән кызыксындык.   

Гадилнең хыялы яшүсмерләрне һәм яшьләрне, алай гына түгел, өлкән буынны да  гаджетлардан беразга гына булса да арындырып тору. Шушы максат белән бер төркем эшче төркем үзара фикерләшәләр дә, үзләренең уй-хыяллар проектын конкурска җибәрергә булалар. “Күрше-фест” фестиваленә үзләре уйнап үскән урам уеннарын искә төшереп, аларны заманчалаштырып, “Күңелле стартлар” белән берләштереп, яңа программа төзегәннәр. “Без балачакта уйнаган уеннарны хәзерге балаларга күрсәтәсебез, аларда да бу уеннарга карата кызыксыну уятасыбыз килә”, - ди Гадил. 

Әлегә кирәкле җиһазларның кайберсе кайтып җитмәгән. Шуңа күрә алар бәйрәмне август аенда Балтач бистәсендә дүрт ишегалдында уздырырга җыеналар. “Кичен кешеләр фатирларында тик утырмасыннар, ишегалдына чыгып аралашсыннар, рәхәтләнеп үткәннәрне искә алсыннар өчен, яшьләр өчен генә түгел, өлкән буын өчен дә программага төрле уеннар керттек”, - ди Гадил.