“Миннән йорт әйбәт булып калсын дия иде, насыйп булмады, көлгә әйләнде”

Үзе олы яшьтә булгач, миннән йорт әйбәт булып калсын дип, үзенчә әз-мәз пенсиясен җыеп барып, өйне гел яңартып, төзекләндереп торырга тырышты, дип сөйли Рафия апаның кызы Люция Әхмәтҗанова. 
Янгын 14 мартта җомга көнне көндез чыга. Түбәсе янганны күреп, күршеләре йөгереп керә. Рафия апа бу вакытта өйдә була. Ут кыска ялганыштан чыккан дигән фараз бар. 
– Ул көнне мин әнигә иртән, ә апа төшке аш вакытында шалтыраттык. Барысы да яхшы, бернинди хәвеф булыр кебек түгел иде. Шөкер, үзе исән калган. Нигезебез генә калмады. Әти белән әни, бөртекләп, үз көчләре белән салган йорт иде ул. Авылыбыз аша үзәк юл үтә. Өебез таудан менүгә бик матур булып күренеп тора иде. Шуңа да бездә гел юлаучылар булды. Кайсы су сорый, кайсы ватылган машинасын калдыра иде, куна калучылар да күп булды. Әти белән әни берсен дә кире какмадылар, барысына да ярдәм итәргә тырыштылар. Бу хәл килеп чыккач, үзебезгә дә ярдәм итүчеләр күп булды. Авылдашлар булышлыгы белән янган нигезебезне чистарттык. Рәхмәт барысына да! Әнигә бер кечкенә генә йорт салырга ниятләп торабыз. Җыелган акчага кирпечләр сатып алдык. Аллаһ ярдәме белән башкарып чыгарбыз дип торабыз. Әни безгә кунакка килгәч тә, ике атнадан артык тора алмый, үз өемә кайтам дия башлый. Аны ничек тә йортлы итәсе иде, – ди Люция ханым. 
Изге рамазан аенда кем күпме булдыра ала, без дә ярдәм итә алсак иде. Люция Әхмәтҗанованың телефон номеры: 89172233403 (Сбербанкка беркетелгән).