“Татарстан дөяләрне дә экспортлый башлар дип кем уйлаган?!”

– Быел без Абхазиягә өч дөя озаттык. Төркиягә җибәрү планы да бар. Татарстан дөяләрне дә экспортлый башлаячак дип кем уйлаган?! Безнең җитештерүчеләр менә шундый үткеннәр, – дип сөйләде журналистларга Россельхознадзорның Татарстан буенча идарәсе җитәкчесе урынбасары Айрат Таҗетдинов. 
Аның сүзләренчә, республика быел 40 мең тонна бөртеклеләр экспортлаган. Арпа, бодай, солы һәм борчак күбесенчә Кытай, Иран, Казахстан һәм Әзәрбайҗанга китә. Майлы культуралар – Германия, Польша һәм Беларуська. Шулай ук быел Татарстан 100 мең тоннага якын терлекчелек продукциясен экспортлауга ирешкән. Техник май Польшага һәм Чехиягә җибәрелә, ә жом – Кытайга. 

Болардан тыш, Германия, Вьетнам, Эстония, Франция бездән майонезлар да ала. Ә Чаллы туңдырмасын Казахстан, Таҗикстан, Абхазия, Монголия, Әзәрбайҗан, Үзбәкстан һәм Кытай халкы яратып ашый ди. 

– Республикадан озатыла торган бөтен продукция дә җентекләп тикшерелә. Шуннан соң гына рөхсәт кәгазләре бирелә. Аннары продукциянең куркынычсызлык сыйфатын кабул итүче ил үзе дә тикшерә. Бу икеләтә контроль һәм җаваплылык дигән сүз. Шунысы сөендерә: читкә озатылган бөртеклеләрнең сыйфаты буенча шикаятьләр булмады. Бездән яхшы сыйфатлы продукция китә, – диде Айрат Таҗетдинов. 

«Агросәнәгать комплексы продукциясенең иминлеген һәм сыйфатын бәяләү үзәге»нең Татарстандагы филиалы директоры Татьяна Менликиева искәрткәнчә, ашлыкка дәүләт сыйфат мониторингы уздырыла. Тикшерү нәтиҗәләреннән соң гына авыл хуҗалыгы җитештерүчесе үз продукциясен сата ала. 
– Урып-җыю чорында дәүләт мониторингы бушка үткәрелә, ә аннан соң түләүле нигездә, – дип, аграрийларны ул ашыгырга чакырды.

Быел экспортның күләме, узган елның шушы чоры белән чагыштырганда, 5 процентка кимрәк. “Бу алай ук критик күрсәткеч түгел, үткән елгы саннарны куып җитәрбез, дип уйлыйбыз”, – диде Татьяна Менликиева. Кимүнең сәбәбен ул санкцияләр белән бәйләп аңлатты. Германия белән Бельгия майлы культураларны алуны туктаткан, шулай ук Польша да киметкән.