ТНВда 14 сәгатьлек «Всей семьей на выборы» телемарафоны башланды

 Татарстан Үзәк сайлау комиссиясе рәисе Андрей Кондратьев сайлау участокларының эше турында сөйләде.

Студиядә — Татарстанның төрле гаиләләре: танылган гаиләләр, хезмәт династияләре, яшь парлар һәм дистә еллар дәвамында мәхәббәтен саклап килгән гаиләләр.

Шулар арасында Павленколар гаиләсе дә бар. Владимир Павленко — махсус хәрби операция ветераны. Аның уллары Кирилл һәм Константин — Суворов хәрби училищесы укучылары. Ә Чулпан Павленко махсус хәрби операциядә катнашучыларга гуманитар ярдәм әзерләү белән шөгыльләнә.

Чулпан белән Владимир госпитальдә танышкан.

— 2023 елда гуманитар миссия белән барган идем. Ирем белән госпитальдә таныштым. Тормышының иң авыр вакытында мин аның янәшәсендә булдым. 2024–2025 еллар бик авыр узды. Яралары тирән булганлыктан, тернәкләнү дә катлаулы барды. 2025 елда гына ирем аякка баса алды. Мондый авыр мизгелләрдә мәхәббәт тә сынала. Хатын-кыз шундый авыр вакытларда иренә терәк булырга тиеш. Без дә ил язмышы белән бергә, — диде ул.

Чулпан Павленконың бабасы да Бөек Ватан сугышы ветераны булган. «Ватанпәрвәрлек минем канга сеңгән», — ди Чулпан.

Ул шулай ук мина эзләү җиһазлары һәм гуманитар ярдәмне хәрбиләргә җиткерүдә күрсәткән ярдәме өчен Ракета гаскәрләренең медале белән бүләкләнгән.