Буа шәһәрендә тиздән җәннәт бакчасы барлыкка киләчәк

Татарстан Рәисе Рөстәм Миңнеханов инициативасы белән булдырылган “Күрше фест” ишегалды вакыйгалары халык конкурсында Буадан алты территориаль иҗтимагый үзидарәсе катнашкан булган. Һәм шуларның берсе – “Питомник” үзидарәсе генә җиңүче дип табылган.

- “Безнең ишегалды” программасы буенча ишегалдындагы санкцияләнмәгән корылмалар сүтелеп алынгач, халык белән сөйләшеп, бушап калган территорияне төзекләндерергә һәм яшелләндерергә дигән карарга килдек. Безнең иҗтимагый үзидарә территориясенә бер генә урам карый, әмма әлеге микрорайон үсә, индивидуаль торак йортлар төзелә. Аңа шулай ук "Якты Алан" микрорайоны керәчәк. Булачак күршеләр белән дә дус яшәрбез дип ышанабыз, - ди үзидарәнең активы, волонтер Ләйсән Минханова.

Үзидарәнең атамасы “Питомник” дигәнгә сез дә игътибар иткәнсездер. Бактың исә, бу территория янәшәсендә кайчандыр питомник булган. Бу факт та ишегалдында бакча булдыру идеясенә йогынты ясамый калмагандыр. Монда яшәүчеләр арасында кайчандыр шул питомникта эшләүчеләр дә бар ди.

- Проектның исемен “Ишегалдында җәннәт бакчасы” дип атарга булдык. Конкурс документациясен төзүдә бөтен кеше актив катнашты. Конкурс нәтиҗәләренә дә бик сөендек. Ул безне тагын да ныграк берләштерәчәк. Эш белән дә, ял белән дә берләшү кирәк. Уртак эш кешеләрне тагын да якынайта. Кулланышсыз яткан бу территория барыбызның тырышлыгы белән тиздән чәчәккә күмеләчәк. Беренче көнне бөтен кеше җыелып, миләш, алмагач, чия агачлары утыртты. Алар үсеп китеп, өлкәннәр өчен дә, балалар өчен дә шуларның күләгәсендә аралашып утыру күңелле булачак. Алма, чия белән сыйланачаклар. Алай гына да түгел, бу ялларда сирень, гортензия куаклары һәм күпьеллык чәчәкләр утыртырга җыенабыз. Гомумән, бездә халык бик актив, өмәләр оештырабыз, быел җәй башында балалар өчен бәйрәм уздырдык, “Ишегалды уеннары” дигән чара да күңелле үтте. Бакча барлыкка килгәч, ишегалды тагын да җанланыр дип өметләнәбез, - ди Ләйсән.    

«Күрше фест» конкурсына 585 гариза кабул ителгән, шуларның 64е ярдәм алган. Конкурска кабул ителгән һәрбер гариза кимендә өч чара сценарие, җентекле смета һәм календарь планын үз эченә алган. Бәйгедә 42 үзмәшгуль һәм 22 юридик зат җиңүче булган. Бу идарәче компанияләр, территориаль иҗтимагый үзидарә советлары, коммерцияле булмаган оешмалар, шәхси эшмәкәрләр һәм үзенең ишегалдында чаралар оештырырга әзер булган актив шәһәр кешеләре. Иң күп җиңүчеләр саны Казанда, Чаллыда, Әлмәттә, Түбән Камада, Алабугада.