Ярминкәдән соң юл — сайлау участогына

Татарстан Хөкүмәте карары нигезендә көзге авыл хуҗалыгы ярминкәләре башланды.

Казанның Ямашев проспекты белән Әмирхан урамы киселешендәге мәйданда бу шимбәдә Саба, Арча, Кукмара, Кайбыч, Аксубай, Зәй, Биектау, Спасс, Яшел Үзән, Югары Ослан районнары агрохуҗалыклары, фермерлары һәм республика агропредприятиеләре сәүдә итә. Сәүдә рәтләре ит һәм ит продуктлары, сөт-май, балык һәм яшелчәләр белән шыгрым тулы. Бәяләр кибетләрдәгедән 15-20 процентка арзанрак.

— Меңәр баш каз, үрдәк, бройлер чебеш үстерәбез. Ярминкәләрдә бик теләп катнашабыз. Сайлауларда 18 сентябрьдә үк тавыш биреп куйдык, без — ватанпәрвәр укытучылар бит. Яңа Үзи халкы тырыш, һәр гаилә диярлек йөзләгән каз асрый, — диделәр Аксубай районының Яңа Үзи авылыннан Люция белән Фәнис Алимбековлар.

Кайбыч районының Чүти авылындагы авыл хуҗалыгы кооперативы үгезләр үрчетә икән.

— Пилмәннәрне кулдан ясыйбыз, казылыклар җитештерәбез. Ит тә алып килдек, продукцияне акчага әйләндерү яхшы, — диделәр Чүти авылыннан Гөлчәчәк белән Рамил Гайнуллиннар.

Авыллардан ярминкәгә сату итәргә килгән кешеләрнең күпчелеге сайлауларда тавыш биреп куйган инде. Казанлылар да, әле бармаган булсалар, ярминкәдән соң сайлау участокларына юл тотсалар, гражданлык бурычын үтәгән саналырлар.

Ярминкәдәге бәяләр (килограммнарда):

Сыер ите — 600-950 сум,

Бәрәңге, кәбестә, кишер — 30 сум,

Суган — 35 сум, 

Он — 27 сум,

Йомырка (дистәсе) — 95-125 сум.