Рөстәм Миңнеханов аграрийларга язгы кыр эшләрен вакытында оештыру бурычын куйды

Узган биш елда республикада сөт җитештерү 20 процентка арткан, агросәнәгать комплексына инвестицияләр күләме 165 млрд сумнан артып киткән, 16,5 мең авыл хуҗалыгы техникасы сатып алынган. Бу агросәнәгать комплексында хезмәт куйган кешеләрнең зур хезмәте, дип ассызыклады Рөстәм Миңнеханов.
Алда торган язгы кыр эшләрен искә алып, авыл хезмәтчәннәре алдына язгы кыр эшләрен вакытында оештыру бурычын куйды.
- Быел уңай температура уртача еллык күрсәткечләрне узып китә, чәчүне кыска вакыт эчендә башкарырга кирәк. Техниканы кыр эшләре сезонына әзерләүне тизләтү мөһим. Авыл хуҗалыгы министрлыгына, район башлыклары һәм инвесторлар белән бергәләп, техниканы ремонтлауны төгәлләүне тәэмин итәргә кирәк. Минераль ашламаларны вакытында һәм тулы күләмдә сатып алу мөһим. Бурыч элеккечә кала - чәчүлекләрнең бер гектарына кимендә 80 кг ашлама кертергә. Аларны сатып алуга дәүләт ярдәме сакланды, - диде Татарстан Рәисе.
Республиканың терлекчелек төбәге булуын һәм бу юнәлештә җитди уңышларга ирешүебезне дә ассызыклады.
Чираттагы елны без рекордлы күрсәткеч белән тәмамладык - 2,3 млн тоннага якын сөт савылды. Монда Кукмара, Балтач, Әтнә, Саба һәм Минзәлә районнарының өлеше зур. Мөслим районы да яхшы динамика күрсәтә, - диде ул.