Апаста янгын: 4 балалы Мостафиннар гаиләсе йортсыз калган

Коштаулы авылында 4 балалы гаиләнең йорты янып беткән

Әле кайчан гына шау-гөр килеп, бик бәхетле яшәгән бу гаиләнең җылы нигезе — бүген кара көл өеме. Ышанасы да килми диләр. Хаклыкны кабул итүе дә авыр, бүген алар әниләре йортына сыенганнар. Ләкин үзләренекен булдырасылары, кабат өйле буласылары килә.

Янгын вакытында гаиләне этләре коткарган

— Ирем Илнур белән дүрт бала үстерәбез. Олысы Тимурга — 7, Элинага— 6, Динурга — 3, төпчегебез Дианага 1 яшь. Мин ул көнне көндез төпчеген йоклатырга салдым, бишеккә. Үзем аны тирбәтәм, үзем йокласын дип көйлим. Минем телефон Динур кулында иде, ул йөгереп килгән, әни сиңа шалтыраталар, ди. Мин җавап биргәнче шалтыратучы элемтәне өзде дә.

Тукта мин әйтәм, әнинең хәлен белеп алыйм әле. Без аның белән Апаска барып килербез дигән идек, ул Караборнаш авылында яши. Күрше егетен яллап, сеңлемне утыртып безгә киләләр дә, сеңлем минем балалар янында торып тора, ә без кирәк-яраклар алып кайтасы идек. Әни белән сөйләшкәндә, ишетәм, эт ишекне тырный. Өйгә керәсе килә моның, дим әле. Түзмәдем барып ачтым, әрлим имеш. Ишекне ачсам чоланда кап-кара төтен. Эт ук шикелле өйгә атылды. Веранда ягына күз салсам, янып ята. Әнигә, янабыз икән ич, дим. Куркып калдым.

Тиз генә өйгә кереп, балаларны алдым да мунчага чыгарып куйдым. Эт минем арттан, бөтенесен дә аңлый үзе. Тик кенә утырып торыгыз, беркая чыкмагыз дим балаларга. Су алып, веранда ягын сүндерергә тырышып карадым. Ничек кенә тырышсам да, ялкын басылмады, бик тиз күтәрелеп китте, өйгә кереп, документларны да алып чыгарга җитешмәдем, — ди Гөлназ.

Янган йортның элек тә ут күргән булуы ачыкланган

Эт исә шул арада өрә-өрә күршеләргә кереп йөгерә. Үзенчә аларны ярдәмгә килергә эндәшә.

— Каршысына безнең эт кереп баскач, күрше апасы куркып калган. Артыннан йөгереп керсә, шушы хәл. Карап торып яндырдык, әле ныгытып янып китәргә дә өлгермәде кебек, йорт түбәсендәге шифер шартлый да башлады. Янгын сүндерү хезмәте дә бик тиз килеп җитте кебек, ләкин саклап кала алмадылар. Без бу йортны 2021 елда ана капиталы акчасына сатып алган идек. Яңа йорт түгел түгелен, шулай да үз куышыбыз дип бик сөендек, йортымны да ярата идем. 

2023 елда гына белдем, бу йорт безгә кадәр элек тә бер тапкыр янган булган икән. Нәк менә янгын чыккан ягы дөрләп янган. Аны кабат төзекләндергәннәр. Борынгыларның сүзе хак, янган урынга йорт салырга ярамый, барыбер ут үчләшә, үзенекен итә диләр. Ут бер каныккан икән, юкка чыгармыйча туктамый инде, менә теләгенә барыбер иреште, дим. Төпчеген бик авыр тапкан идем, реанимациядә ятып, чак өйгә кайтып егылгач, ике елны үземнең әниләрдә яшәдек. Балаларны карашты булышты ул.

Яз көне генә бу йортны юып, үзебезгә кайтып яши башладык. Ут чыбыкларын алмаштырырга кирәк иде, әти, үзем кереп карыйм, үзем эшлим, бөтенесен дә яңартам дигән иде, өлгермәде генә. Рәхмәтем зур ярдәм иткән кешеләргә, туганнарга, авылдашларга аеруча зур рәхмәт. Тимур улым беренче сыйныфка укырга керде, бөтен киемнәрне алган идек инде, янып юкка чыкты бит. Халык ярдәм иткән акчага аны алып барып киендердек. Инде менә йорт юнәтәсе. Кайларга гына барып карамадык, ярдәм итә алмыйлар. Район хакимияте дә булыша алмады. Без кышка каршы урамда яшәргә тиешбезме икән инде? — дип борчыла Гөлназ ханым.

Янгында балаларның киемнәре һәм гаиләнең барлык әйберләре янып беткән

Янган өйдән исән калган бердәнбер әйбер — иренең йөртүче таныклыгы. Калганы — кара көл өеме. Йортның басып калган диварлары да — кап-кара хәрабә.

— Әле бер көнне мунчага барган идек, әйберләрен җыеп кайтырга. Мунча белән сарайларны саклап калдылар анысы. Берзаман тагын борынга төтен исе керә. Карасак, йортның бер почмагы исән калган идек, шуны кабат ут элгән. Инде бөтенләй бетте...

Йортның элеккеге хуҗалары чормасына салам җәйгәннәр икән, шул да утка ярдәм итте күрәсең, — ди әңгәмәдәшем. — Төпчеге куркып калган. Төннәрен дә сискәнеп уяна. Ә менә Динур бик чая, ул урамнан кәлтә, елан җыеп кайта торган малай. Үскәч, янгын сүндерүче булам ди. Ул көнне Тимур белән Элина әниләрдә иде, алар безнең хәзер йортыбыз да юкмыни дип борчылалар. Ничек тә өйле буласы иде.

Мостафиннар гаиләсенә ярдәм кирәк

Урамда калган Мостафиннар гаиләсенә ярдәм итәргә теләүчеләр 89178797446 номеры буенча Гөлназның Сбербанк картасына ярдәм күчерә ала.