«Чибәр апа»га — 100 яшь: Актанышта хезмәт ветеранын зурладылар

Бу истәлекле вакыйга уңаеннан, Актаныш районы башлыгы Ленар Зарипов юбилярны шәхсән үзе барып котлады. Россия Федерациясе Президенты Владимир Путин һәм Татарстан Республикасы Рәисе Рөстәм Миңнеханов исеменнән котлаулар һәм истәлекле бүләкләр тапшырды. Бүген Зәйтүнә апа Пучы картлар һәм инвалидлар йортында тәрбияләнә.

Авыр балачак һәм сугыш еллары хезмәте
Зәйтүнә Латыйпова 1926 елның 30 апрелендә Такталачык авылында игенчеләр гаиләсендә дөньяга килә. Биш балалы гаиләдә төпчек бала була ул. Авыл мәктәбендә 7 сыйныфны тәмамлауга, Бөек Ватан сугышы башлана.

Яшь кызның иң гүзәл еллары авыр хезмәттә үтә. 1941 елда ул колхоз эшенә җигелә: печән чаба, молотилкада эшли. Урак ура, комбайннар артыннан калмыйча салам өюче булып та хезмәт куя. Урман кисәргә дә йөри. «Тугыз кыш буе авыр шартларда урман кистем, — дип искә ала Зәйтүнә әби. — Урман бездән ерак иде, җәяү йөрдек. Ул вакытларда кычыткан һәм кыр суганы ашап тамак туйдырдык».

Сугыштан соңгы елларда да Зәйтүнә апа тын да алмый эшли: фермада маллар карый, ашханәдә хезмәт куя, салам өюче булып йөри. Ул үзен бик тырыш кеше итеп күрсәтә. Шәхси хуҗалыгында да күпләп мал-туар асрый, яшелчә-бакча үстерә. Көче җиткәнчә башка авылдышларына ярдәм итәргә тырыша.

Зәйтүнә апа кияүгә чыкмый, бар гомерен туганнарына һәм хезмәткә багышлый. 

«Чибәр апа» — җан матурлыгының чагылышы
Зәйтүнә апаны туганнары яратып «Чибәр» яисә «Чибәр апа» дип йөртәләр. Бу исем аңа бары тик тышкы матурлыгы өчен генә бирелмәгән. Ул үзенә аерым өй салып чыкса да, үз дөньясында, башкалардан аерылып яшәргә ашыкмый — гомер буе туганнары белән бергә була, һәр эштә ярдәм кулын суза.

Фәйрүзә Хәниф кызы Төхфәтуллина истәлекләреннән аңлашылганча, алар Зәйтүнә апа белән бербөтен булып, һәр эшне бергәләп башкарып үскәннәр. Ул гаилә өчен туганнан туган сеңел генә түгел, ә апасына үз балаларыдай якын, алтынчы бала кебек кадерле булган.

Хәтер — гомер көзгесе
Бүген Зәйтүнә апа интернат-йортта тәрбиядә яши. Чаллыдан һәм башка төбәкләрдән кайтып йөрүче туганнары — аның өчен иң зур куаныч. «Бервакытта да зарланмады, һәрвакыт канәгать булды», — ди аның турында сеңелесе Фәйрүзә апа.

Юбилярның хәлен белүчеләр арасында Зәйтүнә апаны үз туганыдай якын иткән тәрбияче Лилия Камил кызы Галина да үзенең ихлас теләкләре һәм хис-кичерешләре белән уртаклашты. Лилия Камил кызы бу йортта өч елга якын тәрбияче булып эшли һәм һәр өлкәннең күңеленә юл таба белә. Аның өчен Зәйтүнә апа — сабырлык һәм акыллылык үрнәге.

«Безнең Зәйтүнә апабызга 100 яшь, без аны чын күңелдән котлыйбыз! Ул — бик акыллы, бик чиста кеше. Бар нәрсәдән дә канәгать ул: элекке тормышыннан да, туганнарыннан да, мондагы шартлардан да. Бер канәгатьсез сүз ишеткән юк аннан», — ди Лилия ханым.

Тәрбияче сүзләренчә, Зәйтүнә апаның күңеле һәрвакыт рәхмәтле. Ул монда эшләүчеләрнең хезмәтен югары бәяли, җылы сүзләрен җәлләми. Лилия Камил кызы юбилярга бәхетле картлык теләп, аны бик яратуын әйтте.

Йөз яшьлек юбилярның гомер юлы — ул безнең тарихыбыз. Зәйтүнә Латыйпова саф күңеле, чибәрлеге һәм тыйнаклыгы белән ул тирә-юньдәгеләргә үрнәк булып яшәвен дәвам итә. Иртәләре исәнлек белән тусын, туганнарының җылысын тоеп, сау-сәламәт яшәргә язсын аңа!

Районыбыз горурлыгы
Бүгенге көндә Актаныш районында 100 яшен тутырган 8 өлкән кеше гомер кичерә, аларның 3се — сугыш ветераны.
Зәйтүнә апа кебек нык рухлы, сабыр һәм тырыш өлкәннәребез — безнең өчен үрнәк. Аларга киләчәктә дә сау-сәламәт булып, якыннарының күңел җылысын тоеп, тыныч картлыкта яшәргә язсын!

Ләйсән Газизова.